മാഹി: മദ്യലഹരിയിൽ നടുറോഡിൽ പരാക്രമവുമായി യുവതി.വടക്കുംപാട് കൂളിബസാർ സ്വദേശി റസീല(29)യാണ് നാട്ടുകാർക്ക് ഉപദ്രവമായി മാറിയത്. ഇവരെ പോലീസ് അറസ്റ്റ് ചെയ്തു. മദ്യലഹരിയിൽ വാഹനം ഓടിച്ച് സ്കൂട്ടർ യാത്രക്കാരെ ഇടിച്ച റസീന, അതിക്രമം ചോദ്യം ചെയ്തവരെ കൈയ്യേറ്റം ചെയ്യുന്ന ദൃശ്യങ്ങൾ പുറത്ത് വന്നിരുന്നു.
മദ്യലഹരിയിൽ കാറോടിച്ച റസീന സ്കൂട്ടർ യാത്രക്കാരായ കുടുംബത്തെ ഇടിച്ച് അപകടമുണ്ടാക്കിയിരുന്നു. കാറിടിച്ച് നിയന്ത്രണം വിട്ട സ്കൂട്ടർ മറിഞ്ഞ് ദമ്പതികൾക്കും സ്കൂട്ടറിലുണ്ടായിരുന്ന കുട്ടിക്കും പരിക്കേറ്റു. നാട്ടുകാർ ഇത് ചോദ്യം ചെയ്തതോടെ യുവതി അക്രമാസക്തയായി. മദ്യപിച്ച് വാഹനം ഓടിച്ചത് ചോദ്യം ചെയ്ത യുവാവിന്റെ മൊബൈൽഫോൺ എറിഞ്ഞുടയ്ക്കുകയും നാട്ടുകാരെ മർദ്ദിക്കുകയും ചെയ്തു.
പിന്നാലെ നാട്ടുകാർ പോലീസിനെ വിവരം അറിയിക്കുകയായിരുന്നു. വൈദ്യ പരിശോധനയ്ക്ക് വിധേയമാക്കിയ യുവതി മദ്യപിച്ചതായി തെളിഞ്ഞിട്ടുണ്ടെന്ന് പന്തക്കൽ പോലീസ് പറഞ്ഞു. യുവതി ഓടിച്ചു വന്ന ബലേറൊ കാറും പോലീസ് കസ്റ്റഡിയിലെടുത്തു.
Comments