പലരുടെയും കുട്ടിക്കാലം മുതലുള്ള ശീലമാണ് കൈവിരലുകളിലെ നഖം കടിക്കൽ. മുതിർന്ന് കഴിഞ്ഞാലും ഇത് ഉപേക്ഷിക്കാൻ പലർക്കും സാധിക്കാറില്ല. കടിക്കുന്ന നഖം പലരും അറിഞ്ഞോ അറിയാതെയോ ഭക്ഷിക്കാറുമുണ്ട്.
നഖം കടിക്കുന്നത് മൂലം, കൈ വിരലുകളുടെ ഭംഗി നഷ്ടമാകാറുണ്ട്. മാത്രമല്ല, പലവിധത്തിലുള്ള രോഗങ്ങൾക്കും ഈ ശീലം കാരണമാകാറുണ്ട്. ഇക്കാരണങ്ങാളാലാണ്, നഖം കടിക്കുമ്പോൾ മുതിർന്നവർ നിങ്ങളെ ശകാരിക്കുന്നത്. ഈ ശീലം എങ്ങനെ ഒഴിവാക്കാം എന്ന് പരിശോധിക്കുന്നതിന് മുൻപേ, ഇത് മൂലമുണ്ടാകുന്ന ആരോഗ്യ പ്രശ്നങ്ങൾ എന്തൊക്കെ എന്ന് നോക്കാം.
1. മാരകമായ ബാക്ടീരിയകൾ വയറ്റിലെത്തുന്നു- സാൽമൊണെല്ല, ഇ-കോളി തുടങ്ങിയ ബാക്ടീരിയകൾ നഖം കടിക്കുന്നതിലൂടെ വയറ്റിലെത്തുന്നു. ഇവ ഗുരുതരമായ രോഗങ്ങൾക്ക് കാരണമാകുന്നു.
2. പല്ലുകൾ ദുർബലമാകുന്നു- നഖം കടിക്കുന്നത് മൂലം പല്ലുകൾ കേട് വരുന്നു. നഖങ്ങളിലെ അഴുക്ക് പല്ലിൽ പറ്റിപ്പിടിക്കുന്നു. ഇത് കാലക്രമത്തിൽ പല്ലുകളുടെ ആരോഗ്യം ക്ഷയിപ്പിക്കുന്നു. കനമുള്ള നഖങ്ങൾ സദാ കടിക്കുന്നതിലൂടെ പല്ലുകൾ ദുർബലമാകുന്നു.
3. മാരകമായ രോഗങ്ങൾക്ക് കാരണമാകുന്നു- വായിലൂടെ കുടലിലെത്തുന്ന നഖങ്ങൾ, കാൻസർ ഉൾപ്പെടെയുള്ള മാരക രോഗങ്ങൾക്ക് കാരണമാകുന്നു. മലാശയത്തിലെ അർബുദത്തിന് നഖം കടിക്കുന്ന ശീലം കാരണമാകുന്നു.
നഖം കടിക്കുന്ന ശീലം എങ്ങനെ ഒഴിവാക്കാം?
ഡെർമറ്റോഫാജിയ ഉൾപ്പെടെയുള്ള രോഗങ്ങളിലേക്ക് നഖം കടിക്കുന്ന ശീലം നിങ്ങളെ നയിച്ചേക്കാം. സ്വന്തം ചർമ്മം സ്വയമറിഞ്ഞോ അറിയാതെയോ ഭക്ഷിക്കുന്ന രോഗാവസ്ഥയാണ് ഡെർമറ്റോഫാജിയ. ഇതിന്റെ ഫലമായി കൈവിരലുകളിൽ മുറിവുകളും വ്രണങ്ങളും രൂപപ്പെടാറുണ്ട്.
ചില ആരോഗ്യ വിദഗ്ധർ ഇത്തരം ശീലങ്ങളെ ഒസിഡി (Obsessive Compulsive Disorder) എന്ന മാനസിക പ്രശ്നത്തിന്റെ ഭാഗമായാണ് കാണുന്നത്. നഖം കടിക്കുന്ന ശീലം സ്വയം ഒഴിവാക്കാൻ സാധിക്കുന്നില്ലെങ്കിൽ ഒരു ഡോക്ടറുടെ സഹായം തേടുന്നതാണ് ഏറ്റവും നല്ലത്. മികച്ച കൗൺസിലിംഗിലൂടെ ഈ പ്രശ്നം ഒഴിവാക്കാൻ സാധിക്കുന്നതാണ്.
