തിരുവനന്തപുരം: വിഴിഞ്ഞം പദ്ധതിയിൽ നിന്ന് പിൻമാറില്ലെന്ന് ആവർത്തിച്ച് മുഖ്യമന്ത്രി പിണറായി വിജയൻ. പദ്ധതിയിൽ നിന്ന് പിൻമാറിയാൽ സംസ്ഥാനത്തിന് നിക്ഷേപങ്ങൾ ലഭിക്കില്ല. തുറമുഖത്തിനെതിരായ സമരത്തിന് പിന്നിൽ വലിയ ഗൂഢാലോചന ഉണ്ടെന്നും പിണറായി വിജയൻ ആരോപിച്ചു. ഹരിത ഊർജ്ജ വരുമാന പദ്ധതിയുടെ സംസ്ഥാന തല ഉദ്ഘാടനം നിർവ്വഹിക്കുകയായിരുന്നു മുഖ്യമന്ത്രി.
പദ്ധതി ഉപേക്ഷിക്കാൻ സർക്കാർ തയ്യാറല്ല. നാടിന് ആവശ്യമുളള പദ്ധതികൾ ഏതെങ്കിലും ചില നിഷിപ്ത താല്പര്യക്കാർ തടയാൻ ശ്രമിച്ചാൽ അത് അനുവദിക്കില്ല. മന്ത്രിതല ഉപസമിതി അവരുടെ ആവശ്യങ്ങൾ അംഗീകരിച്ച് കഴിഞ്ഞു. വിഴിഞ്ഞത്ത് തീരശോഷണം സംഭവിച്ചിട്ടില്ല എന്ന് റിപ്പോർട്ടുകൾ വ്യക്തമാക്കുന്നുവെന്നും മുഖ്യമന്ത്രി പറഞ്ഞു.
ഇതിന്റെ പിന്നിൽ വലിയ ഗുഢാലോചന പ്രവർത്തിക്കുന്നുണ്ട്. പോലീസ് സ്റ്റേഷൻ ആക്രമം നേരത്തെ കരുതിക്കൂട്ടി നടത്തിയതാണ്. പോലീസ് സ്റ്റേഷൻ ആക്രമണത്തിന് വേണ്ടി പ്രത്യേകമായി ആളുകളെ സജ്ജരാക്കി. ഇവർ ഇളക്കി വിടാൻ നോക്കുന്ന വികാരം എന്താണെന്ന് പിണറായി ചോദിച്ചു.
എല്ലാ രാഷ്‌ട്രീയക്കാരും ഈ സംഭവത്തെ അപലപിച്ചു. എല്ലാവരും ഒന്നിച്ച് പറയുന്നു പദ്ധതി വേണമെന്ന്. ഏത് വേഷത്തിൽ വന്നാലും അക്രമം വച്ച് പൊറുപ്പിക്കില്ലെന്നും സർക്കാരിന് ഇതിൽ ഒന്നും ചെയ്യാനില്ലെന്നും മുഖ്യമന്ത്രി പറഞ്ഞു.
