പാലക്കാട്: കാട്ടാനയുടെ ആക്രമണത്തിൽ വനവാസി യുവാവ് കൊല്ലപ്പെട്ടു. അട്ടപ്പാടി ഷോളയൂർ ഊത്തുകുഴി ഊരിലെ ലക്ഷ്മണനെയാണ് കാട്ടാന ചവിട്ടിക്കൊന്നത്. പുലർച്ചെ 5 മണിക്കാണ് സംഭവം. വീട്ടിൽ കക്കൂസ് സൗകര്യം ഇല്ലാത്തതിനാൽ പ്രാഥമിക കാര്യങ്ങൾ നിർവഹിക്കുന്നതിന് വീടിന് പുറത്തേക്ക് ഇറങ്ങിയ സമയത്താണ് കാട്ടാന ആക്രമിച്ച് കൊലപ്പെടുത്തിയത്.
കഴിഞ്ഞ കുറേ ദിവസമായി പ്രദേശത്ത് കാട്ടാന ശല്യം രൂക്ഷമാണ്. തുടർന്ന് വനം വകുപ്പ് സംഘം കാട്ടാനയെ തുരത്തിയിരുന്നു. കാട്ടാന തിരികെ പോയിരിക്കാമെന്നാണ് വനവകുപ്പ് ഉദ്യോഗസ്ഥരും പ്രദേശവാസികളും കരുതിയിരുന്നത്. എന്നാൽ പ്രദേശത്ത് നിലയുറപ്പിച്ച ആന പുലർച്ചെ പ്രാഥമിക ആവശ്യങ്ങൾക്കായി ഇറങ്ങിയ സമയത്ത് ആക്രമിക്കുകയായിരുന്നു. തുമ്പിക്കൈകൊണ്ട് ചുഴറ്റിയെടുത്ത് നിലത്തിട്ട് ചവിട്ടിക്കൊന്നുവെന്നാണ് പ്രദേശവാസികൾ പറയുന്നത്.
കാട്ടാന ശല്യത്തിന് ശാശ്വത പരിഹാരം ആവശ്യമാണെന്ന് ഊരുനിവാസികൾ പറഞ്ഞു. വനം വകുപ്പ് ഉദ്യോഗസ്ഥരെത്തി തുരത്തുന്ന ആനകൾ കാട്ടിലേക്ക് കയറിപ്പോകുന്നില്ലെന്നും ഊരിൽ നിന്ന് മാറി നിൽക്കുക മാത്രമാണെന്നും ഉദ്യോഗസ്ഥർ പിൻവാങ്ങിയാൽ ഇവ തിരിച്ചുവരുന്നുണ്ടെന്നും പ്രദേശവാസികൾ പറഞ്ഞു.
