കൊച്ചി: സ്ഫടികം റീമാസ്റ്റേർഡ് റീ റിലീസിന് ആശംസകൾ അറിയിച്ച് നടനും എഴുത്തുകാരനുമായ മുരളി ഗോപി. ചിത്രത്തിലെ ഒരു സംഘട്ടന രംഗം ഫേസ്ബുക്കിൽ പങ്കുവെച്ചു കൊണ്ടാണ് മുരളി ഗോപി ആവേശഭരിതമായ ആശംസകൾ അറിയിച്ചിരിക്കുന്നത്.
സ്ഫടികത്തിലെ മോഹൻലാലിന്റെ ഇൻട്രോ സീനാണ് മുരളി ഗോപി ഫേസ്ബുക്കിൽ പങ്കു വെച്ചിരിക്കുന്നത്. മുഖ്യധാര മലയാള സിനിമയിലെ ഏറ്റവും സ്വാഭാവികവും എന്നാൽ തീക്ഷ്ണവുമായ സംഘട്ടന രംഗങ്ങളിൽ ഒന്ന് എന്നാണ് ഇതിനെ അദ്ദേഹം വിശേഷിപ്പിക്കുന്നത്. ലഭ്യമായ എല്ലാ ജീവനുള്ളതും അല്ലാത്തതുമായ വസ്തുക്കൾ ഉപയോഗിച്ച് സൃഷ്ടിച്ചിരിക്കുന്ന രംഗത്തിൽ മലയാള സിനിമാ ചരിത്രത്തിലെ എക്കാലത്തെയും മികച്ച ചടുല ശരീര ചലനങ്ങളുടെ ഉടമയായ നായകൻ നിറഞ്ഞാടുന്നു. ഇന്നത്തെ കാലത്തും പുതുമയും ആവേശവും നഷ്ടപ്പെടാത്ത താളാത്മകമായ സംഘട്ടന രംഗം എന്ന വിശേഷണത്തോടെയാണ് മുരളി ഗോപി തന്റെ പോസ്റ്റ് അവസാനിപ്പിക്കുന്നത്.
പൊളിറ്റിക്കൽ കറക്ട്നസ്സിന്റെയും അഭിനവ പുരോഗമനത്തിന്റെയും വക്താക്കൾ ലേശം മാറി നിൽക്കുക എന്ന ആഴത്തിലുള്ള ഉപദേശ രൂപേണ, തന്റെ നിലപാടും മുരളി ഗോപി വ്യക്തമാക്കുന്നുണ്ട്.
മലയാളത്തിലെ എക്കാലത്തെയും മികച്ച മാസ് മൂവി എന്ന് വിശേഷിപ്പിക്കപ്പെടുന്ന സ്ഫടികത്തിന്റെ റീമാസ്റ്റേർഡ് റീ റിലീസ് അടുത്തയിടെയാണ് പ്രഖ്യാപിച്ചത്. ഭദ്രൻ സംവിധാനം ചെയ്ത ചിത്രത്തിന്റെ 4k പതിപ്പാണ് റിലീസ് ചെയ്യുന്നത്. 2023 ഫെബ്രുവരി 9നാണ് ചിത്രം പ്രദർശനത്തിനെത്തുന്നത്.
https://www.youtube.com/watch?v=BTh4fF4g4lI
