തമിഴ് നടൻ അജിത്ത് നായകനായി എത്തുന്ന ഏറ്റവും പുതിയ ചിത്രമാണ് തുനിവ്. സംവിധായകൻ എച്ച്. വിനോദ് സംവിധാനം ചെയ്യുന്ന ചിത്രം പൊങ്കൽ റിലീസായി എത്തുമെന്നാണ് ലഭിക്കുന്ന വിവരം. ചിത്രത്തിന്റെ ഫസ്റ്റ് ലുക്ക് പോസ്റ്റർ സമൂഹമാദ്ധ്യമങ്ങളിൽ തരംഗമായിരുന്നു. ഇപ്പോഴിതാ സിനിമയിലെ അജിത്തിന്റെ സ്റ്റൈലിഷ് സ്റ്റില്ലുകൾ സോഷ്യൽ മീഡിയെ പിടിച്ചു കുലുക്കുകയാണ്. നീട്ടി വളർത്തിയ നരച്ച കട്ട താടിയും മുടിയുമായി സ്റ്റൈലിഷ് ലുക്കിലുള്ള താരത്തിന്റെ സ്റ്റില്ലുകളാണ് പുറത്തു വന്നത്.
നെഗറ്റീവ് ഷേഡുള്ള വേഷമാണ് ചിത്രത്തിൽ അജിത്ത് ചെയ്യുന്നതെന്ന് വാർത്തകൾ വന്നിരുന്നു. ‘അജിത്ത് സർ നെഗറ്റീവ് ടച്ചുള്ള വേഷമാണ് ചെയ്യുന്നതെന്ന് പറഞ്ഞാൽ ഉടൻ തന്നെ പ്രേക്ഷകർ ഇത് മങ്കാത്ത മോഡൽ ആണോ എന്നാണ് ചോദിക്കുക’ എന്നും അതുകൊണ്ട് സിനിമയെപ്പറ്റി കൂടുതലൊന്നും വെളിപ്പെടുത്തുന്നില്ലെന്നും എച്ച് വിനോദ് പറയുന്നു. നേർക്കൊണ്ട പാർവൈ, വലിമൈ എന്നിവക്ക് ശേഷം അജിത്- എച്ച് വിനോദ് ടീം ഒന്നിക്കുന്ന ചിത്രമാണ് തുനിവ്.
‘നോ ഗട്ട്സ് നോ ഗ്ലോറി’ എന്നാണ് ആക്ഷന് ത്രില്ലര് ഗണത്തില് പെടുന്ന ചിത്രത്തിന്റെ ടൈറ്റിലിന് നൽകിയിരിക്കുന്ന ടാഗ് ലൈൻ. തുനിവിൽ അജിത്തിന്റെ നായികയായി എത്തുന്നത് മഞ്ജു വാര്യരാണ്. വീര, സമുദ്രക്കനി, ജോണ് കൊക്കെൻ, തെലുങ്ക് നടൻ അജയ് എന്നിവരും ചിത്രത്തില് പ്രധാന വേഷങ്ങളില് എത്തുന്നുണ്ട്. നീരവ് ഷാ ഛായാഗ്രഹണവും വിജയ് വേലുക്കുട്ടി എഡിറ്റിംഗും നിര്വ്വഹിക്കുന്ന ചിത്രം, ബേ വ്യൂ പ്രോജക്ട്സിന്റെ ബാനറിൽ ബോളിവുഡ് നിർമ്മാതാവായ ബോണി കപൂറാണ് നിർമ്മിച്ചിരിക്കുന്നത്.
