ആ കഷണ്ടി തലയിൽ ഉമ്മ കൊടുത്തിട്ടാണ് ഇറങ്ങിയത്; കൊച്ചുപ്രേമനോടൊപ്പമുള്ള അവസാന നിമിഷങ്ങൾ പങ്കുവച്ച് അഭയ ഹിരൺമയി

നടൻ കൊച്ചുപ്രേമന്റെ വേർപാടിൽ വേദന പങ്കുവച്ച് ഗായിക അഭയ ഹിരൺമയി. കൊച്ചുപ്രേമനോടൊപ്പമുള്ള ചിത്രം ഇൻസ്റ്റഗ്രാമിൽ പോസ്റ്റ് ചെയ്ത ഗായിക സുദീർഘമായ കുറിപ്പും പങ്കുവച്ചു. എല്ലാ പ്രാവശ്യത്തെയും പോലെ, അവസാനം കണ്ടിറങ്ങുമ്പോൾ കഷണ്ടി തലയിൽ കെട്ടിപിടിച്ച് ഉമ്മ കൊടുത്തിട്ടാണ് ഇറങ്ങിയതെന്ന് അഭയ ഹിരൺമയി ഓർക്കുന്നു..

ചില്ല് കൂട്ടിൽ വച്ചിരിക്കുന്ന പുരസ്‌കാരങ്ങളെക്കാൾ, അംഗീകാരങ്ങളെക്കാൾ എല്ലാമുപരി, അദ്ദേഹം ചെയ്തു വച്ചിരിക്കുന്ന അസാമാന്യ ക്രാഫ്റ്റ് സൃഷ്ടികളെ നോക്കിനിന്ന് അതിശയിച്ചു പോയിട്ടുണ്ട്. വഴിയിൽ വലിച്ചെറിയുന്ന മിഠായി തുണ്ടുപോലും മാമന്റെ വീട്ടിലെ ഫ്‌ളവർക്കേസിലേക്കുള്ളതാണ്. അതിനുവേണ്ടി മണിക്കൂറുകളോളം ഇരുന്ന് ആസ്വദിച്ച് പണിയെടുക്കുന്നത് കാണുമ്പോൾ ഏറെ സന്തോഷം തോന്നും. ഈ കലാകാരന്റെ മരുമകൾ ആണല്ലോ താനെന്ന് പലവട്ടം അഭിമാനം കൊണ്ടിട്ടുണ്ടെന്നും അഭയ ഹിരൺമയി ഇൻസ്റ്റഗ്രാം പോസ്റ്റിലൂടെ പറഞ്ഞു.

കുടുംബത്തിലെ ഏറ്റവും ഗൗരവക്കാരനായ എന്നാൽ വല്ലപ്പോഴും വായ തുറക്കുന്നയാൾ.. എന്തെങ്കിലും പറയുമ്പോൾ  ചുറ്റുമിരിക്കുന്നവർക്ക് ചിരിക്കാൻ വകയുണ്ടാക്കുന്നയാൾ.. മലയാള സിനിമയുടെ മാത്രമല്ല കുടുംബത്തിന്റെയും അഭിമാനമായ ഈ അഭിനേതാവിന്, താനിതുവരെ കണ്ട പൂർണ കലാകാരന്, കെട്ടിപിടിച്ച് നൂറുമ്മ.. പരാതികൾക്കും പരിഭവങ്ങൾക്കും ഉമ്മവച്ചതിനും സമ്മാനങ്ങൾ തന്നതിനുമെല്ലാം സ്‌നേഹം മാത്രമെന്നും അഭയ ഹിരൺമയി സോഷ്യൽ മീഡിയയിൽ കുറിച്ചു. ആനിക്കുട്ടിയുടെ രാജു അണ്ണന്, ഞങ്ങളുടെ രാജു മാമന് എഴുതുന്ന കുറിപ്പെന്നാണ് പോസ്റ്റിനവസാനം അഭയ പറയുന്നത്.

ശനിയാഴ്ചയായിരുന്നു നടൻ കൊച്ചുപ്രേമൻ അന്തരിച്ചത്. മലയാളത്തിലെ 250ഓളം ചിത്രങ്ങളിൽ വേഷമിട്ട നടന്റെ നിര്യാണത്തിൽ നിരവധി പേർ അനുശോചനം രേഖപ്പെടുത്തിയിരുന്നു. ശ്വാസകോശ സംബന്ധമായ അസുഖത്തെ തുടർന്ന് ചികിത്സയിലിരിക്കെയായിരുന്നു നടന്റെ വേർപാട്.