ബ്രസീലിയ: ആശുപത്രി കിടക്കയിലും ആരാധകർക്ക് ആശ്വാസം പകർന്ന് പ്രശസ്ത ബ്രസീലിയൻ ഫുട്ബോൾ താരം പെലെ. താൻ ശക്തനാണെന്നും, ആരാധകർ വിഷമിക്കരുതെന്നും പെലെ പറഞ്ഞു. ഇൻസ്റ്റഗ്രാമിലൂടെയായിരുന്നു അദ്ദേഹത്തിന്റെ പ്രതികരണം.
ആശുപത്രിയിൽ എത്തിയപ്പോൾ താൻ കൂടുതൽ ശക്തനായതായി തോന്നുന്നു. ചികിത്സ തുടരുകയാണ്. സാധാരണ ജീവിതത്തിലേക്ക് അധികം വൈകാതെ തിരികെ എത്താൻ കഴിയുമെന്നാണ് പ്രതീക്ഷ. ആരാധകർ ശാന്തരായിരിക്കണം. ശുഭാപ്തി വിശ്വാസം കൈവിടരുത്. താൻ ഈശ്വരനിൽ തീവ്രമായി വിശ്വസിക്കുന്നു. ലോകമെമ്പാടുമുള്ള ആരാധകർ നൽകുന്ന സ്നേഹം തനിക്ക് ഊർജ്ജം പകരുന്നുവെന്നും പെലെ ഇൻസ്റ്റഗ്രാമിൽ കുറിച്ചു.
അർബുദ ബാധിതനായ പെലെയെ ശ്വാസകോശത്തിലെ അണുബാധയെ തുടർന്നാണ് ആശുപത്രിയിൽ പ്രവേശിപ്പിച്ചത്. കഴിഞ്ഞ ദിവസം പെലെ കീമോ തെറാപ്പിയോട് പ്രതികരിക്കുന്നില്ലെന്ന വാർത്ത പുറത്തുവന്നിരുന്നു. ഇത് ആരാധകരിൽ പെലെയുടെ ആരോഗ്യം സംബന്ധിച്ച് വലിയ ആശങ്കയാണ് ഉണ്ടാക്കിയത്. ഇതിനിടെയാണ് ആരാധകരെ ആശ്വസിപ്പിച്ച് പെലെ സമൂഹമാദ്ധ്യമത്തിൽ പോസ്റ്റിട്ടത്. ചികിത്സയിൽ തുടരുന്ന അദ്ദേഹത്തിന്റെ ആരോഗ്യനില നിലവിൽ തൃപ്തികരമാണെന്നാണ് ആശുപത്രി അധികൃതർ അറിയിക്കുന്നത്.
