പാലക്കാട്: ലഹരിക്കെതിരെ ബോധവൽക്കരണത്തിനായി ജനം ടിവി സംഘടിപ്പിച്ച ‘ഒരുമിക്കാം നമ്മുടെ മക്കൾക്കായി’ എന്ന പരിപാടിയിലൂടെ മലയാളികളുടെ ശ്രദ്ധ പിടിച്ചുപ്പറ്റിയ വ്യക്തിയാണ് പാലക്കാട് ഡിവിഷനിലെ എക്സൈസ് ഓഫീസർ അബ്ദുൾ ബാസിത്. പാലക്കാട് ഭാരത് മാതാ ഹയർസെക്കൻഡറി സ്കൂളിൽ നടത്തിയ ലഹരി വിരുദ്ധ പരിപാടിയിൽ അബ്ദുൾ ബാസിത്ത് നടത്തിയ പ്രസംഗം സമൂഹമാദ്ധ്യമങ്ങളിൽ വൈറലായിരുന്നു. ഇപ്പോൾ, ജനം ടിവിയുടെ പരിപാടി കണ്ട് അബ്ദുൾ ബാസിതിനെ ആദരിച്ചിരിക്കുകയാണ് സൈനിക സ്കൂളിലെ ഒരു കൂട്ടം വിദ്യാർത്ഥികൾ. വടക്കൻ പറവൂറിലെ ജനറൽ ബിവിൻ റാവത്ത് സൈനിക് സംസ്കൃതി സ്കൂളിലെ വിദ്യാർത്ഥികളാണ് നേരിട്ടെത്തി സല്യൂട്ട് നൽകി അബ്ദുൾ ബാസിതിനെ ആദരിച്ചത്. അനുമോദനം ലഭിച്ചതിൽ സന്തോഷമുണ്ടെന്നും സൈന്യം എന്ന് കേൾക്കുമ്പോൾ ഓരോ ഭാരതീയനും അഭിമാനം കൊള്ളണമെന്നും അദ്ദേഹം ജനം ടിവിയോട് പ്രതികരിച്ചു.
‘പറഞ്ഞറിയിക്കാൻ കഴിയാത്ത അത്രയും സന്തോഷവും അഭിമാനവും തോന്നുന്ന നിമിഷത്തിലൂടെയാണ് ഞാൻ കടന്നു പോകുന്നത്. ലഹരിക്കെതിരെ ക്ലാസ് നടത്തിയ വീഡിയോ രാജ്യത്തിന്റെ പല കോണിലുള്ള ആൾക്കാർ കണ്ടു എന്നത് സന്തോഷം തരുന്ന ഒന്നാണ്. നാലഞ്ച് ദിവസം മുമ്പ് എനിക്ക് ഒരു ഒരു ഫോൺ കോൾ വന്നു. ലേ ലഡാക്കിൽ -27 ഡിഗ്രി സെല്ഷ്യസിൽ നിന്നും സുബേദാർ പദവിയിലിരിക്കുന്ന ഒരു സൈനിക ഉദ്യോഗസ്ഥന്റേതായിരുന്നു ആ ഫോൺ കോൾ. വീഡിയോ കണ്ടുവെന്നും സൈന്യത്തിന്റെ എല്ലാവിധ ആശംസകളും അറിയിക്കുന്നുവെന്നും അദ്ദേഹം പറഞ്ഞു. ആ ഒരു അനുമോദനം എന്റെ ജീവിതത്തിൽ കിട്ടുന്നതിൽ വച്ച് ഏറ്റവും വലിയ ഒന്നാണ്’.
വീഡിയോ കാണാം, ക്ലിക്ക് ചെയ്യുക
‘ഓരോ ഇന്ത്യൻ പൗരനും മനസ്സിൽ അഭിമാനത്തോടു കൂടി വേണം സൈന്യം എന്ന് പറയാൻ. നമുക്ക് ഇവിടെ സുഖമായി ഉറങ്ങാൻ കഴിയുന്നുണ്ടെങ്കിൽ അതിർത്തികളിൽ സ്വന്തം ജീവൻ പോലും കൊടുത്ത് രാജ്യത്തെ കാക്കുന്ന സൈനികരുള്ളതു കൊണ്ടാണ്. രാജ്യത്തിന്റെ സുരക്ഷയ്ക്ക് വേണ്ടി സ്വന്തം കുടുംബത്തെയും മക്കളെയും എല്ലാം മറന്നു കൊണ്ട് ഇന്ത്യ എന്ന് ഒറ്റ വികാരത്തിന്റെ പേരിൽ അതിർത്തികളിൽ കാവൽ നിൽക്കുന്നവരാണ് സൈനികർ. അവരുടെ ആ ബഹുമാനം എനിക്ക് കിട്ടി എന്ന് പറയുന്നതിൽ വലിയ അഭിമാനമുണ്ട്. ഇപ്പോൾ സൈനിക സ്കൂളിൽ നിന്നുള്ള വിദ്യാർത്ഥികളും നേരിട്ട് കാണാനെത്തി. ഭാവി ജവാന്മാരാണ് എനിക്ക് ആശംസ അറിയിക്കാൻ എത്തിയത്’ എന്നും അബ്ദുൾ ബാസിത് പറഞ്ഞു.
