ന്യൂഡൽഹി: ഇന്ത്യയ്ക്ക് ജി 20 അദ്ധ്യക്ഷ പദവി ലഭിച്ചത് മഹത്വവത്കരിക്കാൻ ആഹ്വാനം ചെയ്ത് പ്രധാനമന്ത്രി നരേന്ദ്ര മോദി. രാജ്യത്തെ എല്ലാ പൗരന്മാരും ഈ നേട്ടത്തിൽ അഭിമാനം കൊള്ളണമെന്നും അവരെയും ഈ ചരിത്ര നേട്ടത്തിൽ പങ്കാളികളാക്കണമെന്നും അദ്ദേഹം പറഞ്ഞു. ബിജെപി ദേശീയ ഭാരവാഹികളുടെ യോഗത്തെ അഭിസംബോധന ചെയ്ത് സംസാരിക്കുകയായിരുന്നു അദ്ദേഹം.
പ്രധാനമന്ത്രിയുടെ നിർദേശപ്രകാരം സാംസ്കാരികമായും പരമ്പരാഗതമായും ഇന്ത്യയുടെ കഴിവ് പ്രകടിപ്പിക്കുന്നതിനായി പൊതുജനങ്ങളെ പങ്കെടുപ്പിച്ച് കൊണ്ട് വിവിധ പരിപാടികൾ സംഘടിപ്പിക്കുമെന്ന് പാർട്ടി നേതൃത്വം വ്യക്തമാക്കി. രാജ്യത്തിന്റെ ഈ മഹത്തായ നേട്ടത്തിൽ ഓരോ ഇന്ത്യക്കാരാനും അഭിമാനം കൊള്ളണമെന്നും പാർട്ടി വൃത്തങ്ങൾ പറഞ്ഞു.
ജി20-യുടെ കീഴിലുള്ള ആദ്യ സമ്മേളനത്തിന് രാജസ്ഥാനിലെ ഉദയ്പൂരിൽ തുടക്കമായി. വരുന്ന ഒരു വർഷത്തിൽ 55 നഗരങ്ങളിലായി നടക്കാനിരിക്കുന്ന 200-ഓളം സമ്മേളനങ്ങളുടെ തുടക്കമാണിതെന്ന് പ്രധാനമന്ത്രി സൂചിപ്പിച്ചിരുന്നു. ജി 20 അദ്ധ്യക്ഷ പദവി സംബന്ധിച്ച് അറിയിക്കുന്നതിനും ഭാവി പരിപാടികൾ ചർച്ച ചെയ്യുന്നതിനുമായി രാഷ്ട്രപതി ഭവനിൽ യോഗം വിളിച്ചിട്ടുണ്ട്. വിവിധ രാഷ്ട്രീയ പാർട്ടികളുടെ അദ്ധ്യക്ഷന്മാർക്കാണ് ക്ഷണം. കോൺഗ്രസ് അദ്ധ്യക്ഷൻ മല്ലികാർജുൻ ഖാർഗെ, തൃണമൂൽ കോൺഗ്രസ് അദ്ധ്യക്ഷ മമത ബാനർജി, ഡിഎംകെ അദ്ധ്യക്ഷൻ എംകെ സ്റ്റാലിൻ തുടങ്ങിയവർ യോഗത്തിൽ പങ്കെടുക്കും.
Comments