ഉണ്ണി മുകുന്ദൻ നായകനായി എത്തിയ ഷെഫീക്കിന്റെ സന്തോഷം തിയറ്ററുകളിൽ വിജയ കുതിപ്പ് തുടരുകയാണ്. മേപ്പടിയാന് ശേഷം ഉണ്ണി തന്നെ നിർമ്മിച്ച ചിത്രമാണ് ഷെഫീക്കിന്റെ സന്തോഷം. നവാഗതനായ അനൂപ് പന്തളം സംവിധാനം ചെയ്ത സിനിമയിൽ ഷെഫീക്ക് എന്ന കഥാപാത്രത്തെ വളരെ തന്മയത്വത്തോടെയാണ് ഉണ്ണി മുകുന്ദൻ അവതരിപ്പിച്ചിരിക്കുന്നത്. നടൻ എന്ന നിലയിൽ ഷെഫീക്കിലൂടെയുള്ള ഉണ്ണിയുടെ വളർച്ച ആരാധകർ ആഘോഷമാക്കുകയാണ്. ഇപ്പോൾ, തന്റെ പുതിയ ചിത്രമായ മാളികപ്പുറത്തിന്റെ പ്രമോഷന് തുടക്കം കുറിക്കുന്നു എന്ന് അറിയിക്കുകയാണ് താരം.
‘ നിങ്ങൾ തയ്യാറാണോ! മാളികപ്പുറം സിനിമയുടെ പ്രമോഷൻ ആരംഭിക്കുന്നു. വളരെ സത്യസന്ധമായി പറയാൻ സാധിക്കും, ഒരു കലാകാരനെന്ന നിലയ്ക്കുള്ള എന്റെ നിർണ്ണായക ചുവടു വയ്പ്പായിരിക്കും ഇത്. ഞാൻ അവതരിപ്പിക്കുന്ന ഈ കഥാപാത്രം എനിക്ക് ഏറ്റവും പ്രിയപ്പെട്ടതായി മാറും! ഒപ്പം ഷെഫീക്കിനെ സ്നേഹിച്ചതിന് നന്ദി’ എന്നാണ് ഉണ്ണി മുകുന്ദൻ ഫെയ്സ്ബുക്കിൽ കുറിച്ചത്.
സിനിമാ പ്രേമികൾ പ്രതീക്ഷയോടെ കാത്തിരിക്കുന്ന ചിത്രമാണ് മാളികപ്പുറം. പ്രഖ്യാപനം മുതൽ ചിത്രം ഏറെ ശ്രദ്ധിക്കപ്പെട്ടിരുന്നു. പ്രശസ്ത സംവിധായകൻ ശശി ശങ്കറിന്റെ മകൻ വിഷ്ണു ശശി ശങ്കറാണ് ചിത്രം സംവിധാനം ചെയ്യുന്നത്. അഭിലാഷ് പിള്ളയാണ് തിരക്കഥ എഴുതിയിരിക്കുന്നത്. ഉണ്ണിമുകുന്ദനൊപ്പം ശ്രീപഥ്, ദേവനന്ദ എന്നീ ബാലതാരങ്ങളും പ്രധാന കഥാപാത്രങ്ങളെ അവതരിപ്പിക്കുന്നു. എട്ടു വയസ്സുകാരി കല്യാണിയുടെയും അവളുടെ സൂപ്പർഹീറോ ആയ അയ്യപ്പന്റെയും കഥയാണ് ‘മാളികപ്പുറം’. ആന്റോ ജോസഫിന്റെ ഉടമസ്ഥതയിലുള്ള ആന് മെഗാ മീഡിയയും വേണു കുന്നപ്പിള്ളിയുടെ ഉടമസ്ഥതയിലുള്ള കാവ്യ ഫിലിം കമ്പനിയും ചേര്ന്നാണ് ചിത്രം നിര്മ്മിക്കുന്നത്.
