ഭോപ്പാൽ: കുഴൽക്കണറിൽ വീണ എട്ട് വയസുകാരനെ രക്ഷപ്പെടുത്താനുള്ള ശ്രമങ്ങൾ തുടരുന്നു. മദ്ധ്യപ്രദേശിലെ ബേത്തൂൾ ജില്ലയിലുള്ള പാടഭൂമിയിലെ കുഴൽക്കിണറിലാണ് കുട്ടി വീണത്. ചൊവ്വാഴ്ച വൈകിട്ട് അഞ്ച് മണിയോടെയായിരുന്നു അപകടം.
400 അടി താഴ്ചയുള്ള കിണറിലേക്കാണ് കുട്ടി വീണത്. തന്മയ് ദിയാവാർ എന്ന 8 വയസുകാരൻ പാടത്ത് കളിക്കുന്നതിനിടെ അബദ്ധത്തിൽ കിണറിലേക്ക് വീഴുകയായിരുന്നു. 60 അടി താഴ്ചയിലാണ് കുട്ടി തങ്ങി നിൽക്കുന്നത്.
ഈയടുത്താണ് കുഴൽകിണർ നിർമാണം നടന്നതെന്ന് പോലീസ് അറിയിച്ചു. സമാന്തരമായി മറ്റൊരു കുഴിയെടുത്ത് കുഞ്ഞിനെ രക്ഷിക്കാനുള്ള ശ്രമമാണ് തുടരുന്നത്. കുഞ്ഞിന് ഓക്സിജൻ ലഭ്യമാക്കാനുള്ള സംവിധാനങ്ങൾ സജ്ജമാക്കിയിട്ടുണ്ടെന്നും രക്ഷാപ്രവർത്തകർ പ്രതികരിച്ചു.
