ന്യൂഡൽഹി: പാർലമെന്റിൽ തനിക്ക് സംസാരിക്കാൻ ഇനിയും അവസരം വേണമെന്ന് രാജ്യസഭാ എം പി എച്ച് ഡി ദേവഗൗഡ. ഇരുസഭകളിലും ഒരംഗത്തിന് പരമാവധി 3 മിനിറ്റിൽ കൂടുതൽ സംസാരിക്കാൻ അനുവാദമില്ലാത്തത് കഷ്ണമാണെന്നും ജെഡിഎസ് എം പി പറഞ്ഞു.
പാർലമെന്റിന്റെ ശീതകാല സമ്മേളനം ഇന്നാണ് ആരംഭിച്ചത്. ഇന്ത്യയുടെ നീക്കങ്ങൾ ലോകം ഉറ്റുനോക്കുകയാണെന്ന് പാർലമെന്റിൽ പ്രധാനമന്ത്രി നരേന്ദ്ര മോദി പറഞ്ഞു. ലോകത്തിന് മുന്നിൽ ഇന്ത്യയുടെ അഭിമാനം ഉയരുകയാണെന്നും പ്രധാനമന്ത്രി പറഞ്ഞു.
ജി20 ഉച്ചകോടിക്ക് അദ്ധ്യക്ഷത വഹിക്കാനുള്ള സുവർണാവസരമാണ് ഇന്ത്യക്ക് ലഭിച്ചിരിക്കുന്നത്. ഇന്ത്യയുടെ കരുത്ത് ലോകത്തിന് കാട്ടിക്കൊടുക്കാൻ ഈ അവസരം നമുക്ക് പ്രയോജനപ്പെടുത്താം. ഈ ആശയം മുൻനിർത്തിയാകണം ഈ പാർലമെന്റ് സമ്മേളനം മുന്നോട്ട് പോകാനെന്നും പ്രധാനമന്ത്രി പറഞ്ഞു.
എല്ലാ പാർലമെന്റ് അംഗങ്ങളും ക്രിയാത്മകമായ ചർച്ചകളിൽ പങ്കാളികളാകണം. ഇത് വളരെ പ്രധാനപ്പെട്ട പാർലമെന്റ് സമ്മേളനമാണെന്നും പ്രധാനമന്ത്രി ഓർമ്മിപ്പിച്ചു.
