ന്യൂഡൽഹി : ഗുജറാത്ത് തിരഞ്ഞെടുപ്പിൽ മികച്ച ലീഡ് നേടി മുന്നേറുന്ന ബിജെപിയെ പ്രശംസിച്ച് കേന്ദ്ര പ്രതിരോധ മന്ത്രി രാജ്നാഥ് സിംഗ്. ആദ്യ ഫലസൂചനകൾ പുറത്തുവരുമ്പോൾ 150 സീറ്റുകളിലാണ് ബിജെപി ലീഡ് ചെയ്യുന്നത്. ഏഴാം തവണയും അധികാരത്തിലേറി ബിജെപി ചരിത്രം കുറിക്കുന്നതിലേക്കാണ് കാര്യങ്ങൾ നീങ്ങുന്നത്.
ഗുജറാത്തിലെ ജനങ്ങൾ ബിജെപി ഭരണത്തെ അനുകൂലിക്കുന്നവരാണ്. അവർക്ക് പ്രധാനമന്ത്രി നരേന്ദ്ര മോദിയിൽ അഗാധമായ വിശ്വാസമുണ്ട്. തങ്ങൾ ഗുജറാത്തിൽ ഒരു പുതിയ റെക്കോർഡ് സൃഷ്ടിക്കുകയാണെന്നും രാജ്നാഥ് സിംഗ് പറഞ്ഞു.
ഗുജറാത്ത് മോഡലിനെ ഇന്ന് ആളുകൾ ഏകകണ്ഠേന സ്വീകരിക്കുന്നുണ്ടെന്ന് പാർലമെന്ററി കാര്യമന്ത്രി പ്രഹ്ലാദ് ജോഷി പറഞ്ഞു. പ്രധാനമന്ത്രി നരേന്ദ്ര മോദിയുടെ കീഴിലുളള പദ്ധതികൾ 2000 മുതൽ ആളുകൾ ഇരുകൈകളും നീട്ടി സ്വീകരിച്ചുവരികയാണ്. ഗുജറാത്തിലെ ജനങ്ങളെയും ബിജെപി പ്രവർത്തകരെയും നേതാക്കളയും അഭിനന്ദിക്കുന്നതായും അദ്ദേഹം പറഞ്ഞു.
ഗുജറാത്തിൽ ബിജെപിയുടെ ഭരണത്തുടർച്ച പ്രതീക്ഷിക്കപ്പെട്ട ഒരു കാര്യമാണെന്ന് കേന്ദ്ര മന്ത്രി ഹർദീപ് സിംഗ് പുരി പറഞ്ഞു. പ്രധാനമന്ത്രിയുടെ നേതൃത്വത്തിൽ ബിജെപി നടത്തുന്ന വികസന പ്രവർത്തനങ്ങളുടെ ഫലമാണിത്. ഇത് രാജ്യത്തിനാകെ മാതൃകയാണെന്നും അദ്ദേഹം പ്രതികരിച്ചു.
