ബംഗളൂരു : ബുർഖ ധരിച്ച് സ്റ്റേജിൽ ഗ്രൂപ്പ് ഡാൻസ് അവതരിപ്പിച്ച നാല് വിദ്യാർത്ഥികൾക്ക് സസ്പെൻഷൻ. മംഗളൂരുവിലെ സെന്റ് ജോസഫ് എൻജിനീയറിംഗ് കോളേജിലാണ് സംഭവം. നാല് ആൺകുട്ടികൾ ചേർന്നാണ് ബുർഖ ധരിച്ച് ഗ്രൂപ്പ് ഡാൻസ് അവതരിപ്പിച്ചത്. ഇതിന്റെ വീഡിയോ സമൂഹമാദ്ധ്യമങ്ങളിൽ വ്യാപകമായി പ്രചരിച്ചതോടെയാണ് കോളേജ് നടപടിയെടുത്തത്.
വിദ്യാർത്ഥി അസോസിയേഷൻ സംഘടിപ്പിച്ച പരിപാടിയിലാണ് സംഭവം. നാല് വിദ്യാർത്ഥികൾ ചേർന്ന് സ്റ്റേജിൽ ബാളിവുഡ് ഗാനത്തിന് ചുവടുവെയ്ക്കുകയായിരുന്നു. ഇത് വൈറലായതിന് പിന്നാലെയാണ് വിദ്യാർത്ഥികളെ കോളേജിൽ നിന്ന് സസ്പെന്റ് ചെയ്തത്.
സ്റ്റുഡന്റ്സ് അസോസിയേഷൻ ഉദ്ഘാടന ചടങ്ങിനിടെ സ്റ്റേജിൽ കയറി മുസ്ലീം വിദ്യാർത്ഥികളാണ് നൃത്തം ചെയ്തതെന്ന് കോളേജ് പ്രസ്താവനയിൽ പറഞ്ഞു. ഈ ഡാൻസ് പരിപാടിക്ക് അനുമതി ലഭിച്ചിരുന്നില്ല. അതിനാൽ നൃത്തം ചെയ്ത വിദ്യാർത്ഥികളെ അന്വേഷണവിധേയമായി സസ്പെൻഡ് ചെയ്തിട്ടുണ്ട്. സാമുദായിക പ്രശ്നങ്ങൾ വരുത്തിവെയ്ക്കുന്ന ഒരു പ്രവർത്തനത്തെയും കോളേജ് പിന്തുണയ്ക്കുകയോ ക്ഷമിക്കുകയോ ചെയ്യില്ലെന്നും പ്രസ്താവനയിൽ പറയുന്നു.
