അബുദാബി:അറബ് ലോകത്തിൽ ഇന്ത്യ-യുഎഇ ബന്ധം എക്കാലത്തേക്കാളും ശക്തമായ നിലയിലേക്കാണ് മാറിയിരിക്കുന്നതെന്ന് വിദേശകാര്യമന്ത്രി എസ്.ജയശങ്കർ പറഞ്ഞു. എല്ലാ മേഖലകളിലും ഇന്ത്യയുമായി പങ്കാളിത്തം മെച്ചപ്പെടുത്തിയിരിക്കുന്ന രാജ്യങ്ങളിൽ സുപ്രധാന പങ്കാണ് യുഎഇയ്ക്കുള്ളതെന്നും ഏറെ പ്രതീക്ഷയോടെയാണ് ഇന്ത്യ മുന്നോട്ട് പോകുന്നതെന്നും ജയശങ്കർ പറഞ്ഞു. ഇന്ത്യ-യുഎഇ ബന്ധം അറബ് മേഖലയ്ക്കപ്പുറം ആഗോളതലത്തിലും വ്യാപിപ്പിക്കാനാണ് ധാരണയെന്നും ജയശങ്കർ പറഞ്ഞു.
‘രണ്ടു രാജ്യങ്ങൾ തമ്മിലുള്ള സാധാരണ നയതന്ത്ര ബന്ധത്തിനപ്പുറം ആഴമാണ് ഇന്ത്യ-യുഎഇ ബന്ധത്തിനുള്ളത്. ദീർഘകാലത്തെ വാണിജ്യ വ്യാപാര ബന്ധമാണ് ഇന്ത്യയ്ക്ക് അറബ് ലോക വുമായിട്ടുള്ളത്. അതിനാൽ തന്നെ വലിയ പ്രതീക്ഷയാണുള്ളത്. നിരവധി മേഖലയിൽ നിലവിലുള്ള പങ്കാളിത്തം കൂടുതൽ ശക്തമാക്കാനുള്ള ധാരണയിലാണ് ഇന്ത്യ നീങ്ങുന്നത്. ആഗോള തലത്തിലും ഇരുരാജ്യങ്ങളും സംയുക്തമായ നിരവധി മേഖലയിൽ പ്രവർത്തിക്കും.’ ജയശങ്കർ പറഞ്ഞു.
ആധുനിക ലോകത്തിലെ വിദ്യാഭ്യാസ-ആരോഗ്യ-ശാസ്ത്രസാങ്കേതിക മേഖലയിലാണ് പങ്കാളിത്തം ഏറെ ശക്തമാക്കുന്നത്. ബഹിരാകാശ ദൗത്യങ്ങളിലടക്കം ഭാവിയിൽ സംയുക്ത സഹകരണമാണ് ഇന്ത്യയുമായി യുഎഇ ആഗ്രഹിക്കുന്നത്. വർഷങ്ങളായുള്ള ഊർജ്ജ-ഇന്ധന മേഖലയിലെ പങ്കാളിത്തം കൂടുതൽ ശക്തമാക്കുമെന്നും ജയശങ്കർ പറഞ്ഞു.
