കൊച്ചി : മന്ത്രി വി എൻ വാസവന്റെ ” കോൺഗ്രസിന് ഇപ്പോൾ ഇന്ദ്രൻസിന്റെ വലിപ്പം” എന്ന പരാമർശത്തിൽ പ്രതികരിച്ച് നടൻ. താൻ കുറച്ച് പഴയ ആളാണെന്നും, താൻ എന്താണെന്ന് സ്വയം നല്ല ബോധ്യമുണ്ടെന്നും ഇന്ദ്രൻസ് പറഞ്ഞു. മന്ത്രിയുടെ പരാമർശത്തിൽ വിഷമമില്ലെന്നും ഇന്ദ്രൻസ് പ്രതികരിച്ചു.
” അമിതാഭ് ബച്ചന്റെ ഉയരം എനിക്കില്ല. അദ്ദേഹത്തിന്റെ കുപ്പായം എനിക്ക് പാകമാകില്ല. അത് സത്യമല്ലേ” എന്നാണ് ഇന്ദ്രൻ ചോദിച്ചത്. താൻ കുറച്ച് പഴയ ആളാണ്. ഉള്ളത് ഉള്ളത് പോലെയാണ് പറയേണ്ടത്. മന്ത്രി അങ്ങനെ പറഞ്ഞതിൽ വിഷമമില്ലെന്നും താൻ എന്താണെന്ന് തനിക്ക് നല്ല ബോധ്യമുണ്ടെന്നും ഇന്ദ്രൻസ് പറഞ്ഞു.
അമിതാഭ് ബച്ചന്റെ പൊക്കമുണ്ടായിരുന്ന കോൺഗ്രസ് ഇപ്പോൾ ഇന്ദ്രൻസിന്റെ വലിപ്പത്തിൽ എത്തിയിരിക്കുന്നുവെന്നാണ് മന്ത്രി സഭയിൽ പറഞ്ഞത്. ഇത് വൻ വിവാദങ്ങൾക്ക് വഴിവെച്ചു. സാംസ്‌കാരിക വകുപ്പ് മന്ത്രി മലയാളത്തിലെ പ്രമുഖ നടനെ അപമാനിച്ചുവെന്നാണ് പ്രതിപക്ഷം ഉയർത്തിയ വിമർശനം. ഇത് പിൻവലിക്കാനും മന്ത്രിയോട് പ്രതിപക്ഷം ആവശ്യപ്പെട്ടിരുന്നു.
അതേസമയം മന്ത്രിയുടെ പരാമർശം സഭാ രേഖകളിൽ നിന്ന് നീക്കം ചെയ്യാൻ സ്പീക്കർ നിർദ്ദേശിച്ചു. പരാമർശം വിവാദമായതിന്റെ പശ്ചാത്തലത്തിൽ സഭാ രേഖകളിൽ നിന്ന് നീക്കണമെന്ന് ആവശ്യപ്പെട്ട് വാസവൻ കത്ത് നൽകുകയായിരുന്നു. തുടർന്നാണ് നടപടി.
