അമൃത്സർ: പഞ്ചാബിൽ വൻ സ്വർണ്ണക്കടത്ത് സംഘത്തെ പിടികൂടി. അമൃത്സറിലെ ശ്രീ ഗുരുറാം ദാസ് ജി അന്താരാഷ്ട്ര വിമാനത്താവളം വഴി ലക്ഷങ്ങളുടെ വിദേശ കറൻസി കടത്താൻ ശ്രമിച്ച യുവതിയെ കസ്റ്റംസ് അറസ്റ്റ് ചെയ്തിരുന്നു. ഇവരിൽ നിന്ന് ലഭിച്ച വിവരത്തിന്റെ അടിസ്ഥാനത്തിൽ നടത്തിയ അന്വേഷണത്തിലാണ് സ്വർണ്ണക്കടത്ത് സംഘത്തെ പിടികൂടിയത്.
കഴിഞ്ഞ ദിവസമാണ് അമൃത്സറിലെ വിമാനത്താവളത്തിൽ നിന്ന് 18 ലക്ഷത്തോളം രൂപയുടെ വിദേശ കറൻസി നോട്ടുകളുമായി യുവതിയെ പിടികൂടിയത്. എയർ ഇന്ത്യ വിമാനത്തിൽ ദുബായിലേക്ക് പോകാൻ ശ്രമിക്കുകയായിരുന്നു ഇവർ. തുടർന്ന് നടത്തിയ പരിശോധനയിൽ വിവിധ രാജ്യങ്ങളുടെ കറൻസികൾ ഇവരിൽ നിന്ന് കണ്ടെത്തി. അരയിൽ കെട്ടി ഒളിപ്പിച്ച നിലയിലായിരുന്നു നോട്ടുകൾ.
വിശദമായ ചോദ്യം ചെയ്യലിലാണ് വിദേശ കറൻസികളും സ്വര്ണ്ണവും കടത്തുന്ന റാക്കറ്റിന്റെ ഭാഗമാണ് ഈ സ്ത്രീയെന്ന് വ്യക്തമാകുന്നത്. തുടർന്ന് കള്ളക്കടത്ത് സംഘത്തിലെ പ്രധാനിയേയും അറസ്റ്റ് ചെയ്തു. ഇന്ത്യയിലെ വിവിധ വിമാനത്താവളങ്ങൾ വഴി 5 കോടി രൂപയിലധികം മൂല്യമുള്ള വിദേശ കറൻസിയും 2.05 കോടി വിലമതിക്കുന്ന സ്വർണവും കടത്തിയതായി ഇവർ സമ്മതിച്ചിട്ടുണ്ട്. കസ്റ്റഡിയിലെടുത്ത ഇരുവരേയും കോടതിയിൽ ഹാജരാക്കിയ ശേഷം റിമാൻഡ് ചെയ്തു.
