റാഞ്ചി: രഞ്ജി ട്രോഫിയിൽ ജാർഖണ്ഡിനെതിരെ കേരളം ആദ്യ ദിനത്തിൽ ഭേദപ്പെട്ട നിലയിൽ. 6ന് 276 റൺസാണ് കേരളം ആദ്യ ദിനം സ്‌കോർ ചെയ്തത്. ഓപ്പണർമാരായ രോഹൻ പ്രേമും രോഹൻ കുന്നുമ്മലും നായകൻ സഞ്ജു സാംസണും നേടിയ അർദ്ധ സെഞ്ച്വറി കളാണ് ആദ്യ ദിനത്തിലെ പ്രത്യേകത.
ആദ്യ വിക്കറ്റിൽ 90 റൺസിന്റെ മികച്ച കൂട്ടുകെട്ടാണ് രോഹന്മാരുടെ സഖ്യം നേടിയത്. ഓപ്പണർമാരായ രോഹൻ പ്രേം(79) രോഹൻ കുന്നുമ്മൽ(50) എന്ന നിലയിലാണ് മികച്ച തുടക്കം നൽകിയത്. തുടർന്ന് മധ്യനിരയിൽ ഷോൺ റോജർ(1), സച്ചിൻ ബേബി(0) എന്നിവർ പെട്ടന്ന് പുറത്തായതോടെ ഉറച്ചു നിന്ന് പൊരുതിയ സഞ്ജു തകർപ്പൻ ബാറ്റിംഗിലൂടെ ജാർഖണ്ഡിന്റെ ബൗളർമാരെ അതിർത്തി കടത്തി. 7 സിക്‌സറും 4 ഫോറുമടക്കം 72 റൺസാണ് സഞ്ജു നേടിയത്.
അക്ഷയ് ചന്ദ്രൻ(39 നോട്ടൗട്ട്) സിജോമോൻ സോസഫ്(28 നോട്ടൗട്ട്) എന്നിവരാണ് ക്രീസി ലുള്ളത്. സഞ്ജുവിന് പിന്നാലെ സന്ദർശക ഓൾറൗണ്ടർ ജലജ് സക്‌സേന പൂജ്യത്തിന് റണ്ണൗട്ടായത് കേരളത്തിന് ക്ഷീണമായി. ജാർഖണ്ഡിനായി ഷഹ്ബാസ് നദീം 3 വിക്കറ്റും ഉത്കർഷ് സിംഗ് രണ്ടു വിക്കറ്റും വീഴ്‌ത്തി.
