ധാക്ക: ഏകദിന പരമ്പര നഷ്ടമായതിന് പിന്നാലെ ടെസ്റ്റിലും ഇന്ത്യക്കെതിരെ മികച്ച പ്രകടനവുമായി ബംഗ്ലാദേശ്. ഒന്നാം ടെസ്റ്റിന്റെ ഒന്നാം ദിനം കളി അവസാനിക്കുമ്പോൾ ഇന്ത്യയെ 6 വിക്കറ്റ് നഷ്ടത്തിൽ 278 എന്ന സ്കോറിൽ ഒതുക്കാൻ ബംഗ്ലാ ബൗളർമാർക്കായി.
ടോസ് നേടി ബാറ്റിംഗ് തിരഞ്ഞെടുത്ത ഇന്ത്യക്ക് 50 റൺസ് എടുക്കുന്നതിനിടെ 3 വിക്കറ്റുകൾ നഷ്ടമായത് തിരിച്ചടിയായി. എന്നാൽ പരിചയ സമ്പന്നനായ ചേതേശ്വർ പുജാരയും ശ്രേയസ് അയ്യരും ഇന്ത്യയെ കൂട്ടത്തകർച്ചയിൽ നിന്നും കരകയറ്റി. പുജാര 90 റൺസെടുത്ത് പുറത്തായി. അയ്യർ 82 റൺസുമായി ബാറ്റിംഗ് തുടരുകയാണ്. മികച്ച തുടക്കം ലഭിച്ചിട്ടും അത് മുതലാക്കാനാകാതെ ഋഷഭ് പന്ത് 46 റൺസിൽ വിക്കറ്റ് വലിച്ചെറിഞ്ഞു. മറ്റ് ബാറ്റർമാരെല്ലാം നിരാശപ്പെടുത്തി.
ബംഗ്ലാദേശിന് വേണ്ടി 3 വിക്കറ്റുമായി തൈജുൾ ഇസ്ലാം മികച്ച ബൗളിംഗ് പുറത്തെടുത്തു. മെഹ്ദി ഹസന് 2 വിക്കറ്റ് ലഭിച്ചു.
