എറണാകുളം: ബിരിയാണിൽ കൃത്രിമ നിറം ചേർക്കുന്നവർക്കെതിരെ കർശന നടപടിയ്ക്കൊരുങ്ങി ഭക്ഷ്യ സുരക്ഷാ വിഭാഗം. കൃത്രിമ നിറം ചേർക്കുന്നവർക്ക് ആറ് മാസം തടവും അഞ്ച് ലക്ഷം രൂപ പിഴയും ലഭിക്കുമെന്ന് ഭക്ഷ്യസുരക്ഷാ വിഭാഗം അറിയിച്ചു. ഭക്ഷണത്തിൽ നിറം ചേർക്കുന്നതുമായി ബന്ധപ്പെട്ട് വ്യാപക പരാതികൾ ഉയർന്നതോടെയാണ് മുന്നറിയിപ്പുമായി അധികൃതർ രംഗത്ത് എത്തിയത്.
ഭക്ഷ്യസുരക്ഷാ വിഭാഗം ഔദ്യോഗിക ഫേസ്ബുക്ക് അക്കൗണ്ട് വഴിയാണ് ഇക്കാര്യം അറിയിച്ചത്. ഹോട്ടൽ ഭക്ഷണങ്ങളുടെ സുരക്ഷ ഉറപ്പാക്കുന്നതിനായി വിവിധയിടങ്ങളിൽ അധികൃതർ പരിശോധന നടത്തിവരികയാണ്. ഇതിനിടെയാണ് കൃത്രിമ നിറങ്ങൾ ചേർക്കുന്നതിനെതിരെ രംഗത്ത് വന്നിരിക്കുന്നത്. മുന്നറിയിപ്പ് ലംഘിച്ച് കൃത്രിമ നിറങ്ങൾ ചേർക്കുന്നത് ശ്രദ്ധയിൽപ്പെട്ടാൽ പൊതുജനങ്ങൾക്ക് 1800 425 1125 എന്ന നമ്പറിൽ വിളിച്ച് അറിയിക്കാം.
അടുത്തിടെ ഓപ്പറേഷൻ ഷവർമ്മ, ഓപ്പറേഷൻ ഓയിൽ എന്നീ ദൗത്യങ്ങളുടെ ഭാഗമായി ഹോട്ടലുകളിൽ വ്യാപക പരിശോധന നടത്തിയിരുന്നു.
