തെലുങ്ക് സൂപ്പർസ്റ്റാർ നന്ദമൂരി ബാലകൃഷ്ണ നായകനാകുന്ന ഏറ്റവും പുതിയ ചിത്രമാണ് വീരസിംഹ റെഡ്ഡി. ആരാധകർ ഏറെ പ്രതീക്ഷയോടെ കാത്തിരിക്കുന്ന ചിത്രത്തിലെ “സുഗുണ സുന്ദരി” എന്ന ഗാനം പുറത്തിറക്കിയിരിക്കുകയാണ് അണിയറ പ്രവർത്തകർ. ബാലകൃഷ്ണയും തെന്നിന്ത്യൻ താരസുന്ദരി ശ്രുതി ഹാസനും ഒന്നിച്ചുള്ള ഗാനമാണ് പുറത്തിറങ്ങിയിരിക്കുന്നത്. ശ്രുതി ഹാസനൊപ്പം സ്റ്റൈലിഷ് ലുക്കിലാണ് ഗാനത്തിൽ ബാലകൃഷ്ണ പ്രത്യക്ഷപ്പെട്ടിരിക്കുന്നത്. താരത്തിന്റെ ചടുലമായ നൃത്തം തന്നെയാണ് ആരാധകർക്ക് അവേശമാകുന്നത്. തമന് എസ് സംഗീതം പകർന്ന ഗാനം ആലപിച്ചിരിക്കുന്നത് റാം മിറിയാലയും സ്നിഗ്ധ ശർമ്മയുമാണ്.
ചിത്രത്തിലെ ജയ് ബാലയ്യ എന്ന ഗാനം നേരത്തെ അണിയറ പ്രവർത്തകർ റിലീസ് ചെയ്തിരുന്നു. കറുത്ത ഷർട്ടും മുണ്ടും ധരിച്ച്, നരച്ച താടിയും പിരിച്ചു വച്ച മീശയും കൂളിംഗ് ഗ്ലാസും അണിഞ്ഞാണ് വീരസിംഹ റെഡ്ഡിയിൽ ബാലകൃഷ്ണ എത്തുന്നത്. ബാലയ്യ ആരാധകരെ കോരിതരിപ്പിക്കുന്ന തരത്തിൽ ഒരുക്കിയിരിക്കുന്ന ഒരു മാസ്സ് ആക്ഷൻ ത്രില്ലറാണ് വീരസിംഹ റെഡ്ഡി. ശ്രുതി ഹാസൻ, ദുനിയ വിജയ്, വരലക്ഷ്മി ശരത്കുമാർ, ചന്ദ്രിക രവി തുടങ്ങിയവർ പ്രധാന വേഷത്തിലെത്തുന്നു.
മൈത്രി മൂവി മേക്കേഴ്സ് നിർമ്മിച്ചിരിക്കുന്ന സിനിമ, നന്ദമൂരി ബാലകൃഷ്ണയുടെ നൂറ്റിയേഴാം ചിത്രമാണ്. പ്രശസ്ത എഴുത്തുകാരൻ സായ് മാധവ് ബുറയാണ് സംഭാഷണങ്ങൾ എഴുതിയിരിക്കുന്നത്. ഛായാഗ്രഹണം ഋഷി പഞ്ചാബിയും എഡിറ്റിംഗ് നവീൻ നൂലിയും നിർവ്വഹിക്കുന്നു. വെങ്കട്, റാം- ലക്ഷ്മൺ ടീം എന്നിവർ ഒരുക്കിയ സംഘട്ടന രംഗങ്ങളായിരിക്കും ബിഗ് ബജറ്റിലൊരുക്കിയിരിക്കുന്ന ചിത്രത്തിന്റെ പ്രധാന ആകർഷണം. 2023 ജനുവരി 12 സംക്രാന്തി റിലീസായിട്ടാണ് ചിത്രമെത്തുക.
