മലയാളികൾക്ക് ഏറെ പ്രിയപ്പെട്ട താരപുത്രനാണ് കാളിദാസ് ജയറാം. ‘കൊച്ചു കൊച്ചു സന്തോഷങ്ങൾ’ എന്ന ചിത്രത്തിലൂടെ മലയാളികളുടെ ഹൃദയത്തിൽ സ്ഥാനം പിടിക്കാൻ കാളിദാസിന് കഴിഞ്ഞിരുന്നു. ബാലതാരമായി തിളങ്ങിയ കാളിദാസ് പിന്നീട് നായകനായി എത്തിയപ്പോഴും പ്രേക്ഷകരെ കയ്യിലെടുത്തു. തെന്നിന്ത്യൻ സിനിമാ മേഖലയിൽ ശക്തമായ കഥാപാത്രങ്ങളിലൂടെ തന്റേതായ ഇടം സൃഷ്ടിക്കാനും താരപുത്രന് സാധിച്ചിട്ടുണ്ട്.
അച്ചൻ ജയറാമിനും അമ്മ പാർവ്വതിക്കും സഹോദരി മാളവികയ്‌ക്കുമെല്ലാം താരം കണ്ണനാണ്. യുവനടന്റെ ഹൃദയത്തിൽ സ്ഥാനം പിടിച്ച പ്രണയിനി തരിണി കലിംഗരായരും കണ്ണനെന്നാണ് കാളിദാസിനെ വിളിക്കുക. താരപുത്രന്റെ പിറന്നാൾ ദിനമായ ഇന്ന് തരിണിയുൾപ്പെടെ കണ്ണന് പ്രിയപ്പെട്ട എല്ലാവരും പിറന്നാൾ പോസ്റ്റുമായി എത്തിയിരിക്കുകയാണ്. കാളിദാസിനൊപ്പമുള്ള നിമിഷങ്ങൾ പങ്കുവച്ചായിരുന്നു പ്രണയിനിയായ തരിണി ആശംസകളുമായി എത്തിയത്.
”നിന്നെ കുറച്ച് കുഴപ്പിക്കുന്ന എന്തെങ്കിലും പോസ്റ്റ് ചെയ്യണമെന്നാണ് കരുതിയത്. പക്ഷെ, ഇത്രയും സ്‌പെഷ്യലായ ഈ ദിവസത്തിൽ നിന്നോട് അത് ചെയ്യേണ്ടെന്ന് വിചാരിച്ചു. ഹാപ്പി ബർത്ത്‌ഡേ കണ്ണാ.. നീയെനിക്ക് അമൂല്യമാണ്.. എല്ലാതിനും നന്ദി..” ഇതായിരുന്നു തരിണി ഇൻസ്റ്റഗ്രാമിൽ കുറിച്ചത്. നീയാണെന്റെ ലോകമെന്ന് കാളിദാസ് ജയറാം പോസ്റ്റിന് താഴെ രേഖപ്പെടുത്തി. കുട്ടിക്കാലത്തെ ചിത്രങ്ങൾ പങ്കുവച്ച് സഹോദരി മാളവികയും കാളിദാസിന്റെ കുഞ്ഞിലെ ചിത്രം പോസ്റ്റ് ചെയ്ത് അമ്മ പാർവ്വതിയും ആശംസകളറിയിച്ചിട്ടുണ്ട്.
