കൊല്ലം: ഭാര്യയെ മണ്ണെണ്ണയൊഴിച്ച് തീ കൊളുത്തി കൊല്ലാൻ ശ്രമിച്ച് ഭർത്താവ്. കൊട്ടാരക്കരയ്ക്ക് സമീപം നടുവത്തൂരിലാണ് സംഭവം. സാരമായി പൊള്ളലേറ്റ എഴുകോൺ സ്വദേശിനി ഐശ്വര്യ നിലവിൽ ആശുപത്രിയിലാണ്. ഭർത്താവായ അഖിൽ രാജിനെ കൊലപാതക ശ്രമത്തിന് പോലീസ് അറസ്റ്റ് ചെയ്തു.
ഇരുവർക്കുമിടയിൽ കുടുംബ പ്രശ്നങ്ങൾ നിലനിന്നിരുന്നുവെന്നാണ് വിവരം. കഴിഞ്ഞ ഏതാനും നാളുകളായി ദമ്പതികൾ അകന്നു കഴിയുകയായിരുന്നു. ഭാര്യയെ കൊല്ലാൻ ശ്രമിക്കുന്നതിലേക്ക് നയിച്ച കാരണമെന്താണെന്ന് പോലീസ് അന്വേഷിച്ച് വരികയാണ്. നിലവിൽ കസ്റ്റഡിയിലുള്ള പ്രതിയെ ചോദ്യം ചെയ്യുകയാണെന്ന് പോലീസ് അറിയിച്ചു.
കന്യാകുമാരിക്ക് സമീപം തക്കലയിൽ കഴിഞ്ഞ ദിവസം രാത്രി ഭാര്യയെ ഭർത്താവ് വെട്ടിക്കൊന്നിരുന്നു. ശേഷം ഇയാൾ ജീവനൊടുക്കാനും ശ്രമിച്ചു. ഭാര്യ പലപ്പോഴും മോഡേൺ വസ്ത്രങ്ങൾ ധരിച്ചിരുന്നത് ഇഷ്ടപ്പെടാത്തതാണ് കൊലപാതകത്തിൽ കലാശിച്ചതെന്നാണ് വിവരം. ഭാര്യ അണിയുന്ന വസ്ത്രത്തിന്റെ പേരിൽ ദമ്പതികൾക്കിടയിൽ വഴക്കുകൾ പതിവായിരുന്നുവെന്ന് വീട്ടുകാർ പറയുന്നു. ബ്യൂട്ടീഷൻ കോഴ്സ് പഠിക്കുകയായിരുന്ന ജെബ പ്രിൻസയാണ് കൊല്ലപ്പെട്ടത്. സംഭവത്തിന് പിന്നാലെ ഭർത്താവ് എബനേസർ ഉറക്കഗുളിക കഴിച്ച് ആത്മഹത്യയ്ക്ക് ശ്രമിച്ചു. നിലവിൽ ഇയാൾ ആശുപത്രിയിൽ ചികിത്സയിലാണ്.
Comments