സോൾ : മിസൈൽ പരീക്ഷണം കണ്ടുനിന്ന് ആസ്വദിക്കുന്ന ഉത്തര കൊറിയൻ ഏകാധിപതി കിം ജോംഗ് ഉന്നിന്റെ ചിത്രമാണ് ഇപ്പോൾ സോഷ്യൽ മീഡിയയിൽ വൈറലാകുന്നത്. സിഗരറ്റ് വലിച്ചുകൊണ്ട് മിസൈൽ പരീക്ഷിക്കുന്നത് നോക്കി നിന്ന് ചിരിക്കുന്ന ചിത്രമാണിത്.പല സിനിമകളിലെയും അതിക്രൂരന്മരായ വില്ലന്മാരെ ഓർമ്മിപ്പിക്കുന്നതാണ് ഈ ചിത്രം.
”ഹൈ ത്രസ്റ്റ് സോളിഡ് ഫ്യുവൽ നോട്ടോർ” എന്ന മിസൈലിന്റെ പരീക്ഷണത്തിനിടെയായിരുന്നു ഇത്. രാജ്യത്ത് ഇത്തരത്തിലുള്ള ആദ്യത്തെ നിർമ്മാണമാണിതെന്ന് കൊറിയൻ സെൻട്രൽ ന്യൂസ് ഏജൻസി റിപ്പോർട്ട് ചെയ്തു.
ഉത്തര കൊറിയയിൽ നിന്ന് വിക്ഷേപിച്ചാൽ യുഎസിൽ എത്തി ആക്രമണം നടത്തുന്ന ഇന്റർകോണ്ടിനെന്റൽ ബാലിസ്റ്റിക് മിസൈൽ പരീക്ഷണമാണ് നടത്തിയത്. മറ്റ് ആധുനീക സാങ്കേതിക വിദ്യകളും നിർമാണത്തിൽ മുതൽക്കൂട്ടായെന്ന് മാദ്ധ്യമങ്ങൾ റിപ്പോർട്ട് ചെയ്യുന്നു.
കഴിഞ്ഞ മാസങ്ങളിൽ ഒന്നിലധികം പോർമുനകൾ വഹിക്കാൻ രൂപകൽപ്പന ചെയ്തിരിക്കുന്ന ഹ്വാസോംഗ്-17 ഐസിബിഎം ഉൾപ്പെടെ ആണവ ശേഷിയുള്ള ബാലിസ്റ്റിക് മിസൈലുകളുടെ പരീക്ഷണം ഉത്തര കൊറിയ നടത്തിയിരുന്നു. ഡിസംബർ ആദ്യവാരം, ഉത്തരകൊറിയയിലെ കിഴക്ക്, പടിഞ്ഞാറൻ തീരങ്ങളിൽ നിന്ന് കടലിലേക്ക് 130 ഓളം ആർട്ടിലറി ഷെല്ലുകൾ പ്രയോഗിച്ചതായി ദക്ഷിണ കൊറിയൻ സൈന്യം റിപ്പോർട്ട് ചെയ്തു. ലോകശക്തികളെ പരാജയപ്പെടുത്തിക്കൊണ്ട് മുന്നേറുക എന്ന ലക്ഷ്യത്തോടെയാണ് ഉത്തര കൊറിയ പ്രവർത്തിക്കുന്നത്.
