പത്തനംതിട്ട : ആറന്മുള പോലീസ് സ്റ്റേഷനിലെ താത്കാലിക ജീവനക്കാരിയെ കടന്നു പിടിക്കാൻ ശ്രമിച്ച പോലീസുകാരനെ സസ്പെൻഡ് ചെയ്തു. പത്തനാപുരം സ്വദേശിയായ സിപിഒ സജീഫ് ഖാനെതിരെയാണ് നടപടി. ജീവനക്കാരിയുടെ പരാതിയിൽ പത്തനംതിട്ട വനിത പോലീസാണ് കേസെടുത്തത്. അന്വേഷണ റിപ്പോർട്ടിന്റെ അടിസ്ഥാനത്തിൽ ജില്ലാ പോലീസ് മേധാവി സ്വപ്നിൽ മധുകർ മഹാജനിന്റേതാണ് നടപടി.
വെള്ളിയാഴ്ച രാവിലെയാണ് സംഭവം. പോലീസ് സ്റ്റേഷൻ വൃത്തിയാക്കാനും ഉദ്യോഗസ്ഥർക്ക് ചായയും മറ്റും ഉണ്ടാക്കുന്നതിന് വേണ്ടി നിയോഗിച്ച യുവതിക്ക് നേരെയാണ് ഉദ്യോഗസ്ഥന്റെ അതിക്രമം. ജോലിക്കെത്തിയ ജീവനക്കാരിയെ അടുക്കളയിൽ വച്ച് ഉദ്യോഗസ്ഥൻ കടന്നുപിടിക്കാൻ ശ്രമിക്കുകയായിരുന്നു. ഇവർ പരാതി നൽകിയതോടെ പ്രശ്നം ഒതുക്കിത്തീർക്കാനും ശ്രമം നടന്നുവെന്നാണ് റിപ്പോർട്ട്.
വിവരം അറിഞ്ഞ ഡിവൈഎസ്പി യുവതിയെ കൗൺസിലിംഗിന് വിട്ടു. അപ്പോഴാണ് യുവതി സംഭവങ്ങൾ തുറന്നുപറഞ്ഞത്. പരാതി നൽകിയതോടെ സജീഫ് ഖാൻ ഒളിവിൽ പോയി. ഇയാൾക്ക് വേണ്ടിയുള്ള തിരച്ചിൽ നടക്കുകയാണ്.
