ദോഹ: ഫുട്ബോൾ ലോകകപ്പിന്റെ കലാശപ്പോരാട്ടത്തിന് സാക്ഷ്യം വഹിക്കാൻ നിരവധി മലയാളികൾക്കാണ് അവസരം ലഭിച്ചത്. അർജന്റീന- ഫ്രാൻസ് പോരാട്ടം നടക്കുന്ന ലുസൈല്‍ സ്റ്റേഡിയത്തില്‍ മലയാളികളുടെ ശബ്ദം ആർത്തിരമ്പുകയാണ്. ഫുട്ബോൾ കളിയുടെ ആവേശത്തിനൊപ്പം മലയാളത്തിന്റെ സൂപ്പ‌ർ താരങ്ങളുടെ സാന്നിധ്യം കൂടിയാണ് മലയാളികളെ സന്തോഷിപ്പിക്കുന്നത്. കലാശപ്പോരാട്ടം കണ്ടാസ്വദിക്കാൻ മമ്മൂട്ടിയും മോഹൻലാലും കാണികളായി സ്റ്റേഡിയത്തിലുണ്ട്. ഇപ്പോഴിതാ, സ്റ്റേഡിയത്തിൽ നിന്നുള്ള മമ്മൂട്ടിയുടെ സെൽഫി സമൂഹമാദ്ധ്യമങ്ങളിൽ വൈറലാകുകയാണ്.
‘ഏറ്റവും വലിയ കായിക മാമാങ്കത്തിന് സാക്ഷ്യം വഹിക്കാൻ ലോകം മുഴുവൻ ദോഹയിലെ ലുസൈൽ സ്റ്റേഡിയത്തിലേക്ക് എത്തുകയാണ്. അർഹതയുള്ള ടീമിന് ലോകകപ്പ് ട്രോഫി ഉയർത്താൻ കഴിയട്ടെ എന്ന് ആശംസിക്കുന്നു’ എന്ന് ഖത്തറിലെത്തിയതിന് പിന്നാലെ മമ്മൂട്ടി ഫെയ്സ്ബുക്കിൽ കുറിച്ചിരുന്നു. സ്റ്റേഡിയത്തിൽ നിന്നുള്ള താരത്തിന്റെ സെൽഫി കൂടി വന്നതോടെ മമ്മൂട്ടി ആരാധകരും മലയാളികളും ചിത്രം ഏറ്റെടുത്തിരിക്കുകയാണ്.
‘ലുസൈൽ സ്റ്റേഡിയത്തിൽ, കരുത്തന്മാരുടെ ഏറ്റുമുട്ടലിന് സാക്ഷ്യം വഹിക്കാനും ലോകത്തിന്റെ പ്രിയപ്പെട്ട ഭ്രാന്തിൽ പങ്കുചേരാനും ഞാനുമുണ്ട്. നിങ്ങളെ എല്ലാവരെയും പോലെ മികച്ച കളിക്കാരിൽ നിന്നും അതിശയകരമായ വിനോദപ്രദമായ കളിക്കായി കാത്തിരിക്കുന്നു’ എന്ന കുറിപ്പോടെ ലുസൈല്‍ സ്റ്റേഡിയത്തില്‍ നിന്നുള്ള തന്റെ ചിത്രം മോഹൻലാലും സമൂഹമാദ്ധ്യമങ്ങളിൽ പങ്കുവെച്ചിരിന്നു.
