ബ്യൂണസ് അയേഴ്സ്: ഫിഫ ലോകകപ്പ് ലയണൽ മെസിയെ സംബന്ധിച്ച് വെറുമൊരു ഫുട്ബോൾ കിരീടമല്ല. ഇതിഹാസ സമാനമായ തന്റെ കരിയറിൽ ഉടനീളം മോഹിപ്പിച്ച്, ഒടുവിൽ കാലത്തിന്റെ കാവ്യനീതി പോലെ കരിയറിന്റെ പരിപൂർണ്ണതയിൽ കൈവന്ന ഒരു നിയോഗമാണ്. ഫുട്ബോൾ ഹൃദയതാളമാക്കിയ, ഫുട്ബോളിന്റെ പേരിൽ അറിയപ്പെടുന്ന അർജന്റീന എന്ന ലാറ്റിനമേരിക്കൻ രാജ്യത്തിന്റെ ഹൃദയതാളമാണ് ഇന്ന് ലയണൽ മെസി. എത്രമേൽ വൈകാരികമായാണ് അദ്ദേഹം ലോകകിരീടം ഏറ്റുവാങ്ങിയത് എന്ന് സമ്മാനദാന ചടങ്ങിൽ ലോകം നേരിട്ട് മനസ്സിലാക്കിയതാണ്.
ഏറ്റുവാങ്ങിയ ശേഷം കിരീടവുമായാണ് മെസി എല്ലായിടങ്ങളിലും പ്രത്യക്ഷപ്പെട്ടത്. ദോഹയിൽ നിന്നും ബ്യൂണസ് അയേഴ്സിൽ വിമാനമിറങ്ങിയപ്പോൾ മുതൽ വിജയഘോഷയാത്രയിൽ ഉടനീളവും, നഗരപ്രദക്ഷിണത്തിലും അദ്ദേഹം കിരീടം താഴെ വെച്ചില്ല. ഇപ്പോഴിതാ, ലോകഫുട്ബോൾ കിരീടം നെഞ്ചോട് ചേർത്ത് ഉറങ്ങുന്ന മെസിയുടെ ചിത്രമാണ് സാമൂഹിക മാദ്ധ്യമങ്ങളിൽ വൈറലാകുന്നത്. മെസിയുടെ തന്നെ ഫേസ്ബുക്ക്- ഇൻസ്റ്റഗ്രാം പേജുകളിലാണ് ചിത്രം ആദ്യം പ്രത്യക്ഷപ്പെട്ടത്.
സമ്മാനദാനത്തിന് തൊട്ടുമുൻപ്, ഒരു കുഞ്ഞിനെ എന്ന പോലെ കിരീടത്തിൽ അരുമയോടെ ചുംബിക്കുന്ന മെസിയുടെ ചിത്രം പുറത്തു വന്നിരുന്നു. ഇതും സാമൂഹിക മാദ്ധ്യമങ്ങൾ ഏറ്റെടുത്തിരുന്നു.
