കൊച്ചി: രാത്രിയിൽ അപകടകരമായി ഇരുചക്രവാഹനം ഓടിച്ച പ്ലസ്ടു വിദ്യാർത്ഥികൾക്കെതിരെ കേസെടുത്ത് മോട്ടോർ വാഹന വകുപ്പ്. നെടുമ്പാശേരി വിമാനത്താവള പരിസരത്ത് നടത്തിയ വാഹന പരിശോധനയിലാണ് മൂന്ന് പേരെ കണ്ടെത്തിയത്. തൃശൂർ മാള സ്വദേശികളായ മൂന്ന് പേരും പ്ലസ്ടുവിന് ഒരേ സ്കൂളിൽ പഠിക്കുന്നവരാണ്.
വീട്ടുകാർ ഉറങ്ങിയെന്ന് ഉറപ്പാക്കിയ ശേഷമാണ് വാഹനമെടുത്ത് പുറത്തിറങ്ങുന്നത്. അവരുണരുന്നതിന് മുൻപ് തിരിച്ചെത്തുന്നതാണ് വിദ്യാർത്ഥികളുടെ പതിവെന്ന് എംവിഡി പറഞ്ഞു. മൂന്ന് പേരുടെയും രക്ഷകർത്താക്കളെ വിളിച്ചുവരുത്തി കേസെടുത്ത ശേഷം അവരോടൊപ്പം വിട്ടയച്ചു.
വിമാനത്താവളത്തിന്റെ പരിസരങ്ങളിലൂടെലുള്ള റോഡുകളിൽ രൂപമാറ്റം വരുത്തിയ മോട്ടോർ സൈക്കിൾ, കാറുകൾ എന്നിവ അമിത വേഗത്തിലും അപകടകരമായും ഓടിക്കുന്നതായി കണ്ടെത്തിയിട്ടുണ്ട്. തത്സമയം വീഡിയോ റെക്കോർഡ് ചെയ്ത് സാമൂഹിക മാദ്ധ്യമങ്ങളിൽ പ്രചരിപ്പിക്കുന്ന കുട്ടികളെ കണ്ടെത്തി എംവിഡി നടപടി സ്വീകരിച്ചുവരുകയാണ്. രാത്രിയിൽ ദേശീയപാതയിലും പരിസരത്തുമുള്ള റോഡുകളിലൂടെയും അതിവേഗത്തിൽ സഞ്ചരിക്കുന്ന വാഹനങ്ങൾ കണ്ടെത്തുന്നതിനും വാഹന വകുപ്പ് പ്രത്യേക പരിശോധന സംഘടിപ്പിക്കുന്നുണ്ട്.
