ചെന്നൈ: ചൈനയിലെ കോവിഡ് വ്യാപനം ആശങ്കപ്പെടുത്തുന്നതാണെങ്കിലും ഇന്ത്യക്കാർ പരിഭ്രാന്തരാകേണ്ടെന്ന് വാക്സിൻ നിർമാതാക്കളായ സെറം ഇൻസ്റ്റിറ്റ്യൂട്ട് സിഇഒ അദാർ പൂനാവാല. ഏറ്റവും മികച്ച വാക്സിൻ കവറേജാണ് ഇന്ത്യ നൽകിയിരിക്കുന്നത് മികച്ച ട്രാക്ക് റെക്കോഡും ഇക്കാര്യത്തിലുണ്ടെന്ന് അദാർ പൂനാവാല പറഞ്ഞു. സെറം ഇൻസ്റ്റിറ്റ്യൂട്ട് വികസിപ്പിച്ച കോവിഷീൽഡ് വാക്സിൻ ഇന്ത്യയുടെ കോവിഡ് പ്രതിരോധത്തിൽ നിർണായകമായിരുന്നു.
ചൈനയിലെ കോവിഡ് വ്യാപനത്തിന്റെ വാർത്തകൾ പുറത്തുവന്നതിന് പിന്നാലെ ട്വിറ്ററിലൂടെ ആയിരുന്നു പൂനാവാലയുടെ പ്രതികരണം. ആത്മവിശ്വാസത്തോടിരിക്കണമെന്നും ആരോഗ്യമന്ത്രാലയവും
കേന്ദ്രസർക്കാരും പുറപ്പെടുവിക്കുന്ന മാർഗനിർദ്ദേശങ്ങൾ പാലിക്കണമെന്നും അദാർ പൂനാവാല കൂട്ടിച്ചേർത്തു.
ചൈനയിൽ കോവിഡ് വ്യാപനം ഉയർന്നതോടെ മുൻകരുതൽ നടപടിയുടെ ഭാഗമായി കേന്ദ്ര ആരോഗ്യമന്ത്രാലയം അവലോകന യോഗം ചേർന്നിരുന്നു. സ്ഥിരീകരിക്കുന്ന കൊറോണ രോഗികളുടെ സാമ്പിളുകൾ ജനിതക പരിശോധന നടത്താനും നിർദ്ദേശിച്ചിരുന്നു.
ഒമിക്രോൺ ഉപവകഭേദമായ ബിഎഫ് 7 ആണ് ചൈനയിൽ അതിവേഗം പടർന്ന് പിടിച്ചത്. ഇന്ത്യയിലും ഇത് നേരത്തെ കണ്ടെത്തിയിരുന്നതായി റിപ്പോർട്ടുകളുണ്ട്.
