ഇന്ന് വീടിന് പുറത്ത് മാത്രമല്ല,വീടിനകത്തും പലവർണങ്ങളിലുള്ള ചട്ടികളിൽ ചെടികൾ വളർന്ന് നമ്മളിൽ സന്തോഷം നിറയ്ക്കുകയാണ്. അക്കൂട്ടത്തിൽ വലിയ സ്വീകാര്യതയുള്ള ചെടിയാണ് മണിപ്ലാന്റ്. അരേഷ്യയ കുടുംബത്തിൽ ഉൾപ്പെട്ട പുഷ്പിക്കുന്ന ഒരു വള്ളിച്ചെടിയാണ് മണിപ്ലാന്റ്. ഡെവിൾസ് വൈൻ, ഡെവിൾസ് ഐവി, ഗോൾഡൻ പോത്തോസ്, ഹണ്ടേർസ് റോബ് തുടങ്ങിയ പേരുകളിൽ അറിയപ്പെടുന്ന ഈ സസ്യം ഇന്ത്യ, ബംഗ്ലാദേശ്, നേപ്പാൾ തുടങ്ങിയ രാജ്യങ്ങളിൽ മണി പ്ലാന്റ് എന്ന പേരിലാണ് അറിയപ്പെടുന്നത്.
വീടിനെ ഭംഗിയാക്കുന്നതിനോടൊപ്പം പല വിശ്വാസങ്ങളും ചെടികളെ സ്വീകരണമുറിയിലേക്ക് എത്തിച്ചതിന് പിന്നിലുണ്ട്. വീട്ടിലേക്ക് പണം ഒഴുകുന്നതിന് മണി പ്ലാന്റ് സഹായിക്കുമെന്ന വിശ്വാസത്താലാണ് പച്ചയും വെള്ളയും ഇടകലർന്ന ഹൃദയത്തിന്റെ ആകൃതിയിലുള്ള ഇലകളുള്ള ചെടിക്ക് ‘മണി പ്ലാന്റ്’ എന്ന പേര് വരാൻ തന്നെ കാരണമത്രേ.
വീട്ടിൽ ശുദ്ധവായുവും പോസിറ്റീവ് എനർജിയും വർദ്ധിപ്പിക്കാൻ മാത്രമല്ല പണം നിറയ്ക്കാനും മണിപ്ലാന്റിന് കഴിയും എന്ന വിശ്വാസമാണ് മറ്റ് ചെടികളേക്കാൾ ഇതിന് ഇത്ര സ്വീകാര്യത ലഭിക്കാൻ കാരണമെന്ന് സാരം. ഫെങ്ഷൂയി വിശ്വാസപ്രകാരമാണ് മണിപ്ലാന്റ് മണി കൊണ്ടുവരുന്ന ചെടിയായത്. ഇത് കമ്പ്യൂട്ടറിന്റെയോ ടെലിവിഷന്റെയോ സമീപത്ത് വെക്കണം. മണിപ്ലാന്റ് ഉണ്ടെങ്കിൽ ആ വീട്ടിലുള്ളവർക്ക് ഉത്ക്കണ്ഠയും സമ്മർദ്ദവും കുറയുമെന്നും സുഖനിദ്ര ലഭിക്കുമെന്നും ഫെങ്ഷൂയി വിദഗ്ധർ പറയുന്നു.
മണി പ്ലാന്റ് വളർത്തുമ്പോൾ ശ്രദ്ധിക്കേണ്ട കാര്യങ്ങൾ
വീടിന്റെ വടക്ക് കിഴക്ക് ഭാഗത്ത് മണി പ്ലാന്റ് നടരുതെന്നാണ് ഫെങ്ഷൂയി വിശ്വാസം. ഈ ദിശയിൽ ചെടി വെച്ചാൽ സാമ്പത്തിക നഷ്ടം, കുടുംബാംഗങ്ങളുടെ ആരോഗ്യ നഷ്ടം എന്നിവ സംഭവിക്കും. എന്നാൽ, തെക്ക് കിഴക്ക് ദിശയിൽ മണി പ്ലാന്റ് വെച്ചാൽ കുടുംബത്തിൽ ആരോഗ്യവും സാമ്പത്തിക ഉയർച്ചയും ഉണ്ടാകുമത്രേ. ഉണങ്ങിയ മണി പ്ലാന്റ് ഒരിക്കലും വീടിനുള്ളിൽ സൂക്ഷിക്കരുത്. സാമ്പത്തിക നഷ്ടവും ആരോഗ്യക്കുറവും ഇത് മൂലം ഉണ്ടാകുമെന്നും തെക്ക് കിഴക്ക് ദിശയിൽ മണി പ്ലാന്റ് വെച്ചാൽ ഭാര്യാ ഭർത്താക്കന്മാർക്കിടയിൽ നിരന്തരം വഴക്കുണ്ടാകുമെന്നുമാണ് വിശ്വാസം.
വീട്ടിനുള്ളിലാണ് മണി പ്ലാന്റ് മികച്ച രീതിയിൽ വളർത്തേണ്ടത്. സൂര്യപ്രകാശം നേരിട്ട് സസ്യത്തിൽ പതിക്കാൻ പാടില്ലെന്നുള്ളതാണ് വിശ്വാസം. മറ്റൊന്ന് മണിപ്ലാന്റിന്റെ ഇലകൾ ആരോഗ്യത്തോടെ നിലനിൽക്കുന്നുണ്ടെന്നും ഉണങ്ങിപ്പോകുന്നില്ലെന്നും ഉറപ്പാക്കുക. ചെടിയെ തറയിൽ മുട്ടാൻ അനുവദിക്കരുത്. ഉണങ്ങുന്നുണ്ടെങ്കിൽ അതിന്റെ കൊമ്പുകൾ, ഇലകൾ എന്നിവ വെട്ടിമാറ്റുകയോ മുറിക്കുകയോ ചെയ്യാം. മണി പ്ലാന്റ് പച്ച പാത്രത്തിലോ നീല നിറത്തിലുള്ള കുപ്പിയിലോ സൂക്ഷിക്കുന്നതിലൂടെ നിങ്ങളുടെ ജീവിതത്തിലേക്ക് കൂടുതൽ സമ്പത്ത് ആകർഷിക്കാൻ കഴിയുമത്രേ. ചുവന്ന പാത്രത്തിൽ വളർത്തുന്നത് സമ്പത്ത് നഷ്ടപ്പെടുന്നതിന് കാരണമാകും. മണി പ്ലാന്റ് വാങ്ങുമ്പോൾ അതിന്റെ ഇലകൾ ഹൃദയത്തിന്റെ ആകൃതിയിലാണെന്ന് ഉറപ്പാക്കുക. ഇത് സമ്പത്തും സമൃദ്ധിയും ആകർഷിക്കുകയും ആരോഗ്യകരമായ ബന്ധങ്ങൾ വളർത്തുകയും ചെയ്യുന്നു എന്നാണ് പറയപ്പെടുന്നത്.
