എന്റെ താടി നരച്ചു, നീ അമ്മമാരുടെ ഗ്രൂപ്പിൽ ചേർന്നു; പതിനൊന്ന് വർഷം; ഹൃദയം തൊടുന്ന കുറിപ്പുമായി ദുൽഖർ

മലയാളികളുടെ പ്രിയ താരമാണ് ദുൽഖർ സൽമാൻ. മമ്മൂട്ടി എന്ന താരത്തിന്റെ മകനിൽ നിന്നും ഒരു നടൻ എന്ന നിലയിലേയ്‌ക്കുള്ള ദുൽഖറിന്റെ വളർച്ച അത്ഭുതപ്പെടുത്തുന്നതായിരുന്നു. 2012-ൽ സെക്കന്റ് ഷോ എന്ന ചിത്രത്തിലൂടെയാണ് താരം മലയാള സിനിമയിൽ അരങ്ങേറ്റം കുറിക്കുന്നത്. അതിന് ഒരു വർഷം മുമ്പ് ദുൽഖർ വിവാഹിതനുമായി. ഒരു താരമായും നടനായുമുള്ള ദുൽഖറിന്റെ വളർച്ചയിൽ ഒരു പക്ഷെ ഏറ്റവും കൂടുതൽ പിന്തുണ നൽകിയത് ഭാര്യ അമാൽ സൂഫിയ ആയിരിക്കും. പൊതുവേദികളിൽ പ്രത്യക്ഷപ്പെടാൻ തുടങ്ങിയതോടെ ദുൽഖറിനൊപ്പം അമാലും മലയാളികൾക്ക് പ്രിയപ്പെട്ടവളായി. ഇപ്പോഴിതാ, ഇരുവരും തങ്ങളുടെ പതിനൊന്നാം വിവാഹ വാർഷികത്തിൽ എത്തി നിൽക്കുകയാണ്. ദുൽഖർ തന്നെയാണ് ഇക്കാര്യം സമൂഹമാദ്ധ്യമങ്ങളിലൂടെ അറിയിച്ചിരിക്കുന്നത്.

‘വളരെ വൈകിപ്പോയ പോസ്റ്റ്! പക്ഷേ, ഇന്നത്തെ ദിവസം ഭ്രാന്തമായിരുന്നുവെന്ന് നിനക്കറിയാം. പതിനൊന്ന് വർഷം! ഇത്രയും കാലം എവിടെ പോയി എന്ന് എനിക്കറിയില്ല. എന്റെ താടി നരച്ചപ്പോൾ, നീ അമ്മമാരുടെ ഗ്രൂപ്പിൽ ചേർന്നപ്പോൾ, നമ്മൾ സ്വന്തം വീട് വാങ്ങിയപ്പോൾ. ഈ നാഴികക്കല്ലുകളിലേക്ക് തിരിഞ്ഞുനോക്കുമ്പോൾ, അതെല്ലൊം മറ്റാരുടെയോ കഥ പോലെ തോന്നി. പക്ഷെ, അത് നമ്മുടേതാണ്. നമ്മുടെ തന്നെ കഥ’ എന്ന് വളരെ സാഹിത്യപരമായ ഭാഷയിലാണ് അമാൽ സൂഫിയയ്‌ക്ക് ഫെയ്സ്ബുക്കിൽ ദുൽഖർ ആശംസ കുറിച്ചിരിക്കുന്നത്.

2011 ഡിസംബർ 22-നാണ് ആർക്കിടെക്റ്റായ അമാൽ സൂഫിയയെ ദുൽഖർ വിവാഹം കഴിക്കുന്നത്. ഇപ്പോൾ ഇവർക്ക് മറിയം എന്ന് പേരുള്ള അഞ്ച് വയസുള്ള മകളുമുണ്ട്. ദുൽഖറിനെയും അമാലിനെയും പോലെ തന്നെ പ്രേക്ഷകർക്ക് പ്രിയപ്പെട്ടവളാണ് മറിയവും. വീട്ടുക്കാർ തീരുമാനിച്ചുറപ്പിച്ച വിവാഹമായിരുന്നു ദുൽഖറിന്റേത്. പലപ്പോഴും വിവാഹത്തെ കുറിച്ച് നടന്‍ തന്നെ പല അഭിമുഖങ്ങളിലും പറഞ്ഞിട്ടുണ്ട്. ഒരേ സ്‌കൂളിൽ പഠിച്ചവരാണ് ദുൽഖറും അമാലും. സ്‌കൂളിൽ വെച്ച് കണ്ടിട്ടുണ്ട്. എന്നാൽ, ഒരിക്കൽ ദുൽഖറിന്റെ ഉമ്മ സുൽഫത്ത് അമാലിനെ കണ്ടതോടെയാണ് ഇരുവരുടെയും വിവാഹം നിശ്ചയിക്കുന്നത്.