ഇന്ത്യയുടെ മുൻ പ്രധാനമന്ത്രി അടൽ ബിഹാരി വാജ്‌പേയിയുടെ ജന്മവാർഷികാഘോഷത്തോട് അനുബന്ധിച്ച് ബയോപിക് ചിത്രത്തിന്റെ ഫസ്റ്റ് ലുക്ക് പോസ്റ്റർ പുറത്ത്. ‘മേം അടൽ ഹൂം’ എന്ന ബയോപിക് ചിത്രത്തിന്റെ പോസ്റ്ററാണ് പുറത്തുവിട്ടിരിക്കുന്നത്. ചിത്രത്തിൽ വാജ്പേയി ആയി വേഷമിടുന്ന നടൻ പങ്കജ് ത്രിപാഠി ഇൻസ്റ്റഗ്രാമിലൂടെയായിരുന്നു ചിത്രത്തിന്റെ ഫസ്റ്റ് ലുക്ക് പോസ്റ്റർ പങ്കുവച്ചത്.
ഇന്ത്യയുടെ പ്രധാനമന്ത്രിയായി മൂന്ന് തവണ സേവനം അനുഷ്ഠിച്ചിട്ടുള്ള അടൽ ബിഹാരി വാജ്‌പേയിയുടെ ജീവിതമാണ് ചിത്രം പറയുന്നത്. മേം അടൽ ഹൂം എന്ന സിനിമയിലൂടെ കവിയും രാഷ്‌ട്രതന്ത്രജ്ഞനും മനുഷ്യ സ്‌നേഹിയുമായ വാജ്‌പേയിയെ കാണാനാകും. 2023 ഡിസംബറോടെ ചിത്രം റിലീസ് ചെയ്യുമെന്നാണ് അണിയറ പ്രവർത്തകർ പറയുന്നത്.
‘ദി അൺടോൾഡ് വാജ്പേയി: പൊളിറ്റീഷൻ ആൻഡ് പാരഡോക്സ്’ എന്ന പുസ്‌തകത്തെ ആധാരമാക്കിയാണ് ചിത്രം ഒരുക്കിയിരിക്കുന്നത്. മലയാളി മാദ്ധ്യമപ്രവർത്തകനായ ഉല്ലേഖ് എൻ.പി രചിച്ച പുസ്തകമാണ് ‘ദി അൺടോൾഡ് വാജ്പേയി’. രാഷ്‌ട്രീയ സ്വയംസേവക സംഘത്തിലൂടെ ഭാരതീയ ജനസംഘത്തിലേയ്‌ക്കും പിന്നീട് ഭാരതീയ ജനതാ പാർട്ടിയുടെ അമരക്കാരനായും മാറിയ അടൽബിഹാരി വാജ്പേയി 1996ലാണ് ആദ്യമായി പ്രധാനമന്ത്രി പദത്തിലെത്തുന്നത്. പിന്നീട് 1998ലും 1999ലും അദ്ദേഹം പ്രധാനമന്ത്രിയായി തിരഞ്ഞെടുക്കപ്പെട്ടിരുന്നു. 2018ലാണ് അദ്ദേഹം ലോകത്തോട് വിടപറഞ്ഞത്.
