കോഴിക്കോട്: സന്തോഷ് ട്രോഫി ആദ്യമത്സരത്തിൽ തന്നെ തകർപ്പൻ ജയത്തോടെ കേരളം. സ്വന്തം മണ്ണിൽ രാജസ്ഥാനെ എതിരില്ലാത്ത ഏഴ് ഗോളുകൾക്കാണ് കേരളം തോൽപ്പിച്ചത്. വിഘ്നേഷും നരേഷും റിസ്വാനും നേടിയ ഇരട്ട ഗോളും ഗിൽ ബർട്ടിന്റെ തുടക്കം കുറിച്ച ഗോളുമാണ് കേരളത്തിന് ഗംഭീര ജയം സമ്മാനിച്ചത്.
ആക്രമണ തന്ത്രവുമായി തുടക്കത്തിലേ മുന്നേറിയ കേരളം ആറാം മിനിറ്റിൽ തന്നെ ആദ്യ ഗോൾ നേടി. ഗിൽബർട്ടാണ് ഗോൾ വേട്ടയ്ക്ക് തുടക്കമിട്ടത്. 12-ാം മിനിറ്റിൽ വിഘ്നേഷും ലക്ഷ്യം കണ്ടു. 20-ാം മിനിറ്റിൽ വിഘ്നേഷ് തന്റെ രണ്ടാം ഗോളിലൂടെ കേരളത്തിന്റെ നേട്ടം 3-0 ആക്കി ഉയർത്തി. 23-ാം മിനിറ്റിൽ നരേഷ് നാലാം ഗോളും 36-ാം മിനിറ്റിൽ അഞ്ചാം ഗോളും നേടി.
ആദ്യ പകുതിയിൽ തന്നെ 5-0ന് മുന്നിലായ കേരളം രണ്ടാം പകുതിയിലും രാജസ്ഥാന് ഒരു അവസരവും നൽകാതെ ആക്രമണം തുടരുകയാണ്. 54-ാം മിനിറ്റിൽ റിസ്വാനിലൂടെ കേരളം ആറാം ഗോളും രാജസ്ഥാന്റെ വലയിലെത്തിച്ചു. 80-ാം മിനിറ്റിൽ റിസ്വാൻ തന്റെ ഇരട്ട ഗോളും നേടി കേരളത്തിന് 7-0 എന്ന മിന്നും ജയവും സമ്മാനിച്ചു.
