ന്യൂഡൽഹി: ഭാരത് ബയോടെക്ക് നിർമ്മിച്ച മൂക്കിലൂടെ നൽകുന്ന വാക്‌സിന്റെ നിരക്ക് പ്രഖ്യാപിച്ചു. സ്വകാര്യ ആശുപത്രികളിൽ 800 രൂപയ്‌ക്കും സർക്കാർ കേന്ദ്രങ്ങളിൽ 325 രൂപയ്‌ക്കും വാക്‌സിൻ നൽകുന്നതാണ്. ജിഎസ്ടി ഒഴികെയുള്ള വാക്‌സിന്റെ നിരക്കാണിത്.
മൂക്കിലൂടെ നൽകുന്ന വാക്‌സിനായ ഇൻകൊവാക് (iNCOVACC) കഴിഞ്ഞ ദിവസം കൊവിൻ ആപ്പിൽ എത്തിയിരുന്നു. നിരക്ക് പിന്നീട് അറിയിക്കുമെന്നായിരുന്നു റിപ്പോർട്ട്. 325 രൂപയ്‌ക്ക് സർക്കാർ കേന്ദ്രങ്ങളിലൂടെ നൽകപ്പെടുന്ന വാക്‌സിൻ 2023 ജനുവരി നാലാം വാരം മുതൽ വിതരണം ചെയ്യുമെന്നാണ് ഭാരത് ബയോടെക് വ്യക്തമാക്കുന്നത്.
ലോകത്താദ്യമായി കൊറോണയ്‌ക്കെതിരെ മൂക്കിലൂടെ നൽകുന്ന വാക്‌സിൻ (intranasal vaccine) വികസിപ്പിച്ചെടുത്തതും അടിയന്തിര ഉപഭോഗത്തിന് അനുമതി സ്വന്തമാക്കിയതും ഭാരത് ബയോടെക്ക് ആയിരുന്നു. വൈറസിനെ പ്രതിരോധിക്കാൻ രണ്ട് ഡോസുകളാണ് ഇത് സ്വീകരിക്കേണ്ടത്. കൂടാതെ ഇൻകൊവാക്കിന് ബൂസ്റ്റർ ഡോസും ലഭ്യമാണ്.
