ദോഹ: ഫുട്ബോൾ ഇതിഹാസം ലയണൽ മെസ്സി ലോകകപ്പ് സമയത്ത് ഖത്തറിൽ താമസിച്ച മുറി മിനി മ്യൂസിയമാകുന്നു. ഖത്തർ യൂണിവേഴ്സിറ്റിയാണ് ഇക്കാര്യം പ്രഖ്യാപിച്ചത്. യൂണിവേഴ്സിറ്റി ക്യാമ്പസിലെ ഹോസ്റ്റലിലുള്ള മുറിയിലായിരുന്നു ലോകകപ്പ് മത്സരങ്ങൾക്കായി എത്തിയ മെസ്സിയും കൂട്ടരും താമസിച്ചിരുന്നത്.
29 ദിവസത്തോളം അർജന്റീന ടീം ഖത്തറിൽ കഴിഞ്ഞിട്ടുണ്ട്. നവംബർ മൂന്നാം വാരം മുതൽ ഡിസംബർ 19 വരെയാണ് സംഘം ഖത്തറിൽ തങ്ങിയത്. പിന്നീട് ലോക ചാമ്പ്യന്മാരായി നാട്ടിലേക്ക് മടങ്ങുകയായിരുന്നു.
ഏകദേശം ഒരു മാസത്തോളം മിശിഹായും സംഘവും താമസിച്ച സ്ഥലം അതിമനോഹരമായാണ് ഖത്തർ അലങ്കരിച്ചിരുന്നത്. ഹോസ്റ്റലിലെ ചുമരുകൾക്കും വാതിലുകൾക്കും അർജന്റീനയുടെ ജഴ്സിയുടെ നിറമായിരുന്നു. ചുമരുകൾ നിറയെ ടീം അംഗങ്ങളുടെ ഫോട്ടോകൾ പതിച്ചിരുന്നു. യൂണിവേഴ്സിറ്റി ക്യാമ്പസിനുള്ളിൽ ഒരു മിനി അർജന്റീന തന്നെ പുനഃസൃഷ്ടിക്കാനായിരുന്നു അധികൃതരുടെ ശ്രമം. സുപ്രീം കമ്മിറ്റി ഫോർ ഡെലിവറി ആൻഡ് ലെഗസിയും യൂണിവേഴ്സിറ്റി അധികൃതരും ചേർന്നാണ് താമസ സൗകര്യങ്ങൾ ഒരുക്കിയത്.
