ക്രിക്കറ്റ് താരം മഹേന്ദ്ര സിംഗ് ധോണിയുടെ മകൾക്ക് സർപ്രൈസ് ഗിഫ്റ്റുമായി ലയണൽ മെസ്സി. ഇതിഹാസ ഫുട്ബോൾ താരം മെസ്സി ഒപ്പുവച്ച അർജന്റീനയുടെ ജഴ്സിയാണ് ധോണിയുടെ 7 വയസുള്ള മകൾക്ക് സമ്മാനമായി ലഭിച്ചത്. ധോണിയുടെ പൊന്നോമന സിവ സിംഗ് ധോണിയുടെ ഇൻസ്റ്റഗ്രാം അക്കൗണ്ടിലൂടെ സർപ്രൈസ് കിട്ടിയ ചിത്രങ്ങളും പങ്കുവച്ചിട്ടുണ്ട്.
അച്ഛനെ പോലെ മകളും ! എന്ന തലക്കെട്ടോടെയാണ് സിവയുടെ ഇൻസ്റ്റഗ്രാം പേജിൽ ചിത്രങ്ങൾ പോസ്റ്റ് ചെയ്തിരിക്കുന്നത്. ജഴ്സിയിൽ മെസ്സിയുടെ ഒപ്പ് കൂടാതെ അദ്ദേഹത്തിന്റെ ഒരു സന്ദേശവും കുറിച്ചിട്ടുള്ളതായി കാണാം. Para Ziva എന്നാണ് ജഴ്സിയിൽ എഴുതിയിട്ടുണ്ടായിരുന്നത്. സ്പാനിഷ് ഭാഷയാണിത്. ഇംഗ്ലീഷിൽ ഇതിനർത്ഥം For Ziva (സിവയ്ക്ക് വേണ്ടി) എന്നാണ്.
മെസ്സി ഒപ്പുവച്ച ജഴ്സിയുമായി അത്യധികം സന്തോഷത്തോടെ നിൽക്കുന്ന സിവയുടെ ചിത്രങ്ങൾക്ക് രണ്ടരലക്ഷത്തിലധികം ലൈക്കുകളാണ് ഇതുവരെ ലഭിച്ചത്. ഇൻസ്റ്റഗ്രാമിൽ 1.9 ദശലക്ഷം ഫോളോവേഴ്സ് സിവയ്ക്കുണ്ട്.
