സിനിമാ പ്രേമികൾ കാത്തിരിക്കുന്ന ഉണ്ണിമുകുന്ദൻ ചിത്രം മാളികപ്പുറത്തിന് ഏതാനും മണിക്കൂറുകൾ മാത്രം ബാക്കി നിൽക്കുകയാണ്. ഡിസംബർ 30ന് തീയേറ്ററിലെത്തുന്ന സിനിമയെ ഏറെ പ്രതീക്ഷയോടെയാണ് മലയാളികൾ വരവേൽക്കുന്നത്. ചിത്രത്തിന്റെ പ്രമോഷൻ വർക്കുകൾ പുരോഗമിക്കെ ഏറെ രസകരമായ ഒരു വീഡിയോ പങ്കുവച്ചിരിക്കുകയാണ് നടൻ ഉണ്ണിമുകുന്ദൻ.
ജനിച്ച് ഏതാനും ദിവസങ്ങൾ മാത്രം പ്രായമുള്ള കുഞ്ഞ് ഒരാളുടെ കൈകളിലിരുന്ന് കരയുകയാണ്. നിർത്താതെ കരയുന്ന കുഞ്ഞ് തന്റെ പിതാവിന്റെ കരങ്ങളിലാണെന്നാണ് കാഴ്ചക്കാർ ഊഹിക്കുന്നത്. പെട്ടെന്ന് സമീപത്ത് വച്ചിരിക്കുന്ന ലാപ്‌ടോപ്പിൽ അയ്യപ്പ സ്തുതിഗാനം മുഴങ്ങി. വാവിട്ട് കരഞ്ഞിരുന്ന കുഞ്ഞ് പാട്ട് ശ്രദ്ധിക്കാൻ തുടങ്ങി. കരച്ചിൽ പൂർണമായും നിർത്തിയതിന് ശേഷം ഹരിവരാസനം ഗാനം ആസ്വദിച്ച് കിടക്കുന്ന കുഞ്ഞിനെയാണ് പിന്നീട് വീഡിയോയിൽ കാണാൻ സാധിക്കുക.
”അയ്യപ്പ സ്വാമിയെന്നാൽ മനുഷ്യ മനസ് കെട്ടിച്ചമച്ചെടുത്ത എന്തെങ്കിലുമല്ല, ഒരു ഭ്രമവുമല്ല, സ്വാമി ശരണം! എത്ര മനോഹരമായ കാഴ്ചയാണിത്” ഉണ്ണിമുകുന്ദൻ വീഡിയോയ്‌ക്ക് അടിക്കുറിപ്പ് നൽകി. മാളികപ്പുറത്തിന്റെ സംവിധായകനെയും നിർമാതാവിനെയും പ്രധാന കഥാപാത്രങ്ങളെ അവതരിപ്പിരിക്കുന്ന അഭിനേതാക്കളെയും ടാഗ് ചെയ്തായിരുന്നു ഉണ്ണിമുകുന്ദൻ വീഡിയോ പോസ്റ്റ് ചെയ്തത്.
വീഡിയോയ്‌ക്ക് താഴെ നിരവധി പേർ മാളികപ്പുറം ചിത്രത്തിന് ആശംസയുമായെത്തി. അയ്യപ്പ സ്തുതിഗാനത്തെക്കുറിച്ചുള്ള ഓർമ്മകളും പലരും പങ്കുവച്ചു. സിനിമയ്‌ക്കായുള്ള ടിക്കറ്റ് ബുക്കിംഗ് ബുധനാഴ്ചയോടെ ആരംഭിച്ചിരുന്നു.
