തിരുവനന്തപുരം : ഛത്തീസ്ഗഡിനെതിരെ അനായാസ ജയത്തിനൊരുങ്ങി കേരളം. രണ്ടാം ഇന്നിംഗ്‌സിൽ 287ന് ആതിഥേയരെ പുറത്താക്കിയ കേരളത്തിന് ജയിക്കാൻ രണ്ടാം ഇന്നിംഗ്‌സിൽ 126 റൺസ് മതി.
ആദ്യ ഇന്നിംഗ്‌സിൽ 149ന് ഛത്തീസ്ഗഡിനെ വീഴ്‌ത്തിയ കേരളം മറുപടിയായി 311 റൺസാണ് എടുത്തത്. രണ്ടാം ഇന്നിംഗ്‌സിൽ ഛത്തീസ്ഗഡ് കുറേക്കൂടി മെച്ചപ്പെട്ട പ്രകടനമാണ് കാഴ്ചവെച്ചത്. നായകൻ ഹർപ്രീത് സിംഗിന്റെ ഉജ്വല സെഞ്ച്വറി(152)യുടെ മികവിലാണ് ആതിഥേയർ 287 റൺസ് എടുത്തത്.
കേരളത്തിനായി 6 വിക്കറ്റ് വീഴ്‌ത്തി ജലജ് സക്‌സേനയയാണ് തകർപ്പൻ ബൗളിംഗ് പുറത്തെടുത്തത്. വൈശാഖ് ചന്ദ്രൻ രണ്ടുവിക്കറ്റും നേടി.
രണ്ടാം ഇന്നിംഗ്‌സിൽ നാളെ ഒരു ദിവസത്തെ കളി ബാക്കി നിൽക്കേ കേരളത്തിന് ജയിക്കാൻ 126 റൺസ് മതി. രാജസ്ഥാനോട് സമനില പിടിച്ച കേരളം ഛത്തീസ്ഗഡിനെതിരെ ജയം ഉറപ്പിച്ചിരിക്കുകയാണ്.
