ന്യൂഡൽഹി: ഉത്തരാഖണ്ഡിലെ ഉത്തരകാശിയിൽ പച്ചനിറമുള്ള ബലൂണുകളും ലാഹോർ എന്നെഴുതിയ ബാനറും കണ്ടെടുത്തു. ഏകദേശം നൂറോളം പച്ച ബലൂണുകളാണ് കണ്ടെത്തിയത്. ലാഹോർ ബാർ അസോസിയേഷൻ എന്നെഴുതിയ പച്ച ബാനറും ബലൂണുകൾക്കൊപ്പം ഉണ്ടായിരുന്നു. ഉത്തരകാശിയിലെ ചിന്ന്യാലിസൗറിൽ ശനിയാഴ്ചയാണ് സംഭവം.
മേഖലയിൽ ഇന്ത്യൻ വ്യോമസേന ഉപയോഗിക്കുന്ന എയർസ്ട്രിപ്പ് സ്ഥിതിചെയ്യുന്നുണ്ട്. ലാൻഡിംഗ് ഗ്രൗണ്ടിന് സമീപമുള്ള വനമേഖലയിൽ നിന്നാണ് ബലൂണുകളും ബാനറും കണ്ടെത്തിയത്. ഇന്ത്യ-ചൈന അതിർത്തിയിൽ നിന്നും 125 കിലോമീറ്റർ അകലെയാണ് ചിന്ന്യാലിസൗർ.
100 ബലൂണുകളും ഒരു കയറിൽ കെട്ടി ബന്ധിപ്പിച്ചിട്ടുണ്ട്. ലാഹോർ ബാർ അസോസിയേഷൻ എന്ന് ഇംഗ്ലീഷിലും അറബിക്കിലും എഴുതിയ ബാനറാണ് സമീപമുണ്ടായിരുന്നത്. സംഭവത്തിൽ അധികൃതർ അന്വേഷണം ആരംഭിച്ചിരിക്കുകയാണ്. എവിടെ നിന്നാണ് ബലൂണുകളും ബാനറുകളും എത്തിയതെന്നാണ് തേടുന്നത്.
Comments