പന്തളം: മാളികപ്പുറം വിജയമാക്കി തീർത്ത പ്രേക്ഷകർക്കും അയ്യപ്പഭക്തർക്കും നന്ദി പറഞ്ഞ് നടൻ ഉണ്ണി മുകുന്ദൻ. പന്തളത്ത് എത്തിയതായിരുന്നു താരം. കേരളത്തിലൊട്ടാകെ 150-ഓളം എക്സ്ട്രോ ഷോകൾ കളിക്കുന്നുണ്ടെന്നും ഇന്ത്യയിലെ ഏറ്റവും വലിയ സൂപ്പർ ഹിറോ ആയ അയ്യപ്പന്റെ സിനിമ ജനങ്ങൾ ഏറ്റെടുത്തതിൽ സന്തോഷമുണ്ടെന്നും നടൻ മാദ്ധ്യമങ്ങളോ‌ട് പറഞ്ഞു.
‘മാളികപ്പുറം എന്ന സിനിമ നിർമ്മിച്ച ആന്റോ ജോസഫിനോടും വേണു കുന്നിപ്പിള്ളിയോ‌ടും നന്ദി ഉണ്ട്. സിനിമ വലിയ വിജയമാക്കി മാറ്റിയ സിനിമാ പ്രേമികളോടും അയ്യപ്പ ഭക്തരോടും നന്ദി പറയുകയാണ്. മണ്ഡലകാലത്തു തന്നെ സിനിമ തിയറ്ററിൽ ഇറക്കാൻ കഴിഞ്ഞതാണ് ഏറ്റവും വലിയ സന്തോഷം. ഇന്ന് മാത്രം കേരളത്തിൽ 150-ഓളം എക്സ്ട്രാ ഷോകൾ കളിക്കുന്നുണ്ടെന്നാണ് ലഭിക്കുന്ന വിവരം. കേരളത്തിലുടനീളം ഹൗസ്ഫുൾ ഷോകളാണ്’.
‘മാളികപ്പുറം ഇന്ത്യയിലെ സൂപ്പർ താരത്തിന്റെ ചിത്രമാണ്, അയ്യപ്പന്റെ ചിത്രമാണ്. നല്ല ഒരു ആശയം മുന്നോട്ട് വച്ച ഒരു കൊച്ചു സിനിമയാണിത്. കല്ലു എന്ന മോൾക്ക് അയ്യപ്പനെ കാണണമെന്ന ആഗ്രഹമാണ് മാളികപ്പുറം എന്ന സിനിമ. ചിത്രത്തിന്റെ അണിയറ പ്രവർത്തകർക്കെല്ലാം നന്ദി രേഖപ്പെടുത്തുന്നു. അയ്യപ്പന് വേണ്ടിയുള്ള ഒരു സമർപ്പണമാണ് മാളികപ്പുറം. എല്ലാവരും ചിത്രം തിയറ്ററിൽ തന്നെ പോയി കാണണം’ എന്നും ഉണ്ണിമുകുന്ദൻ പറഞ്ഞു.
