കൊച്ചി: മാളികപ്പുറം ചിത്രത്തിന്റെ തരംഗത്തിലാണ് സിനിമാ പ്രേമികൾ. കേവലം ഉണ്ണിമുകുന്ദന്റെ ആരാധകർ മാത്രമല്ല, സിനിമയെ ഇഷ്ടപ്പെടുന്നവർ ഒന്നടങ്കം മാളികപ്പുറം സിനിമയെ സ്വീകരിച്ചുകഴിഞ്ഞു. ഈ അവസരത്തിൽ പ്രേക്ഷകർക്ക് നന്ദി പറഞ്ഞ് എത്തിയിരിക്കുകയാണ് നടൻ ഉണ്ണി മുകുന്ദൻ.
മാളികപ്പുറം ഇരുകൈയ്യും നീട്ടി സ്വീകരിച്ച എല്ലാ കുടുംബ പ്രേക്ഷകർക്കും നന്ദിയുണ്ടെന്ന് ഫേസ്ബുക്ക് പോസ്റ്റിലൂടെ നടൻ പറഞ്ഞു. എല്ലാവർക്കും നമസ്കാരം. പുതുവത്സരാശംസകൾ. ”എന്റെ ഏറ്റവും പുതിയ സിനിമയായ മാളികപ്പുറം ഇരുകൈയ്യും നീട്ടി സ്വീകരിച്ച കേരളത്തിലെ എല്ലാ കുടുംബ പ്രേക്ഷകർക്കും ഹൃദയം നിറഞ്ഞ നന്ദി അറിയിക്കുന്നു. ഞാൻ നേരത്തെ പറഞ്ഞതുപോലെ മാളികപ്പുറം എനിക്കൊരു നിയോഗമായിരുന്നു. അതുപോലെ അയ്യപ്പന്റെ ജന്മഗൃഹമായ പന്തളത്ത് ഇന്ന് എത്താനും തിരുവാഭരണം ദർശിക്കാനും സാധിച്ചത് ഒരു സുകൃതമായി കാണുന്നു. ഒരുപാട് സ്നേഹം. ഒരുപാട് നന്ദി. സിനിമ കാണാത്തവർ കുടുംബസമേതം തിയേറ്ററിൽ വന്നു കാണുമെന്നു പ്രതീക്ഷിക്കുന്നു.” ഉണ്ണി മുകുന്ദൻ ഫേസ്ബുക്കിൽ കുറിച്ചു.
മാളികപ്പുറം ചിത്രം റിലീസ് ചെയ്ത് മൂന്നാം ദിവസം പൂർത്തിയാകുമ്പോഴേക്കും തീയേറ്ററുകളിൽ റെക്കോർഡ് കളക്ഷനാണ് ചിത്രം നേടിക്കൊണ്ടിരിക്കുന്നത്. മാസ്സിന് മാസ്സ്, ക്ലാസ്സിന് ക്ലാസ്.. എന്നാണ് സിനിമ കണ്ട ഭൂരിഭാഗം പേരുടെയും പ്രതികരണം. ശബരിമലയിൽ ചെന്ന് ദർശനം ലഭിച്ച അനുഭൂതിയുണ്ടെന്നും അതേസമയം മാളികപ്പുറം വെറും ഭക്തിനിർഭരമായ ചിത്രം മാത്രമല്ലെന്നും കാഴ്ചക്കാർ പറയുന്നു. മാളികപ്പുറം ചിത്രത്തിന്റെ ഭാഗമാകാൻ കഴിഞ്ഞത് ഒരു നിയോഗമാണെന്നും നടൻ ഉണ്ണി മുകുന്ദൻ ആവർത്തിച്ചു.
