ലക്നൗ: ഇസ്ലാം മതം ഉപേക്ഷിച്ച് തിരികെ സനാതന ധർമ്മത്തിലേക്ക് മടങ്ങി നിർബന്ധിത മതപരിവർത്തനത്തിന് ഇരയായ ഹിന്ദു കുടുംബം. കട്ടൗലി സ്വദേശിയായ മുഹമ്മദ് ഉവൈസ് എന്ന സോനുശർമ്മയും കുടുംബവുമാണ് ഹിന്ദു മതത്തിലേക്ക് മടങ്ങിയെത്തിയത്. ആര്യസമാജ ഭവനിൽ നടന്ന ചടങ്ങിലാണ് ഹിന്ദു മതം സ്വീകരിച്ചത്.
വർഷങ്ങൾക്ക് മുൻപാണ് സോനു ശർമ്മയും കുടുംബവും ഇസ്ലാം മതം സ്വീകരിച്ചത്. തൊഴിൽ രഹിതനായ സോനുവിനെ സമീപത്തെ മദ്രസയിലെ ഇമാമും സംഘവും ചേർന്ന് ജോലി വാഗ്ദാനം ചെയ്ത് ഇസ്ലാം മതം സ്വീകരിക്കാൻ നിർബന്ധിക്കുകയായിരുന്നു. നിവൃത്തികേടിനെ തുടർന്ന് സോനു കുടുംബത്തോടെ മതം മാറി. മുഹമ്മദ് ഉവൈസിയെന്ന പേരും സ്വീകരിച്ചു. എന്നാൽ മതംമാറിയിട്ടും അദ്ദേഹത്തിന് ജോലി ലഭിച്ചില്ല. തുടർന്ന് നടത്തിയ പരിശ്രമത്തിലാണ് ജോലി ലഭിച്ചത്. ഇതോടെ ഇമാമും സംഘവും കബളിപ്പിക്കുകയായിരുന്നുവെന്ന് അദ്ദേഹം മനസ്സിലാക്കുകയായിരുന്നു. ഇതോടെ സനാതന ധർമ്മത്തിലേക്ക് തന്നെ മടങ്ങാൻ തീരുമാനിക്കുകയായിരുന്നു.
തുടർന്ന് അദ്ദേഹം ആര്യസമാജവുമായി ബന്ധപ്പെട്ട് ഹിന്ദു മതം സ്വീകരിക്കണമെന്ന് ആവശ്യപ്പെട്ടു. ഇതോടെ ഇവരുടെ നേതൃത്വത്തിൽ ചടങ്ങുകൾ സംഘടിപ്പിക്കുകയായിരുന്നു. ഹിന്ദു മതത്തിലേക്ക് മടങ്ങിയെത്തിയതിൽ അതിയായ സന്തോഷമുണ്ടെന്ന് സോനുവും കുടുംബവും പ്രതികരിച്ചു.
