ഉണ്ണി മുകുന്ദൻ നായകനായ മാളികപ്പുറം ജനഹൃദയങ്ങൾ കീഴടക്കുകയാണ്. സിനിമാ പ്രേമികളുടെയും അയ്യപ്പഭക്തരുടെയും അനുമോദനങ്ങൾ ഏറ്റുവാങ്ങി കേരളമൊട്ടാകെ നിറഞ്ഞ സദസ്സിൽ പ്രദർശനം തുടരുകയാണ് മാളികപ്പുറം. ചിത്രത്തിന്റെ വിജയത്തിന് പിന്നാലെ സിനിമ പ്രദർശിപ്പിക്കുന്ന തിയറ്ററുകൾ സന്ദർശിക്കുകയാണ് നടൻ ഉണ്ണി മുകുന്ദനും മാളികപ്പുറം ടീമും. തിയറ്ററുകളിൽ വലിയ സ്വീകരണമാണ് മാളികപ്പുറം ടീമിന് പ്രേക്ഷകർ നൽകുന്നത്. ഇപ്പോൾ, അത്തരത്തിലൊരു സ്വീകരണത്തിന്റെ വീഡിയോയാണ് സമൂഹമാദ്ധ്യമങ്ങളിൽ വൈറലാകുന്നത്. തിയറ്റർ സന്ദർശിക്കാനെത്തിയ ഉണ്ണി മുകുന്ദന്റെ ഒരു കൂട്ടം അമ്മമാർ ചേർന്ന് സ്വീകരിക്കുകയും കെട്ടിപ്പിടിക്കുകയും ചെയ്യുന്ന വീഡിയോയാണിത്. നിർമ്മാതാവ് ആന്റോ ജോസഫാണ് ഈ മനോഹര വീഡിയോ ഷെയർ ചെയ്തിരിക്കുന്നത്.
വീഡിയോ കാണാം, ക്ലിക്ക് ചെയ്യുക
2022 ഡിസംബർ 30-നാണ് ഉണ്ണി മുകുന്ദൻ നായകനായി എത്തിയ മാളികപ്പുറം റിലീസ് ചെയ്തത്. കല്യാണി എന്ന എട്ടു വയസ്സുകാരിയുടെയും അവളുടെ സൂപ്പർ ഹീറോ ആയ അയ്യപ്പന്റെയും കഥ പറയുന്ന ചിത്രം സംവിധാനം ചെയ്തിരിക്കുന്നത് നവാഗതനായ വിഷ്ണു ശശി ശങ്കറാണ്. അഭിലാഷ് പിള്ളയാണ് തിരക്കഥ ഒരുക്കിയിരിക്കുന്നത്. സൂപ്പർസ്റ്റാർ പദവിയിലേയ്ക്കുള്ള ഉണ്ണി മുകുന്ദന്റെ ചുവട് വയ്പ്പാണ് മാളികപ്പുറമെന്ന് ആരാധകരും സിനിമാ പ്രേമികളും പറയുന്നു.
മനോജ് കെ ജയൻ, സൈജു കുറുപ്പ്, രമേശ് പിഷാരടി, സമ്പത്ത് റാം, ആൽഫി പഞ്ഞിക്കാരൻ എന്നിവരും ചിത്രത്തിൽ പ്രധാന വേഷങ്ങളിൽ എത്തുന്നു. ഛായാഗ്രഹണം-വിഷ്ണുനാരായണൻ, സംഗീതം, പശ്ചാത്തല സംഗീതം- രഞ്ജിൻ രാജ്. ആന്റോ ജോസഫും വേണു കുന്നപ്പിള്ളിയും ചേർന്നാണ് ചിത്രം നിർമ്മിച്ചിരിക്കുന്നത്.
