ഭുവനേശ്വർ: വന്യമൃഗങ്ങളുടെ തോൽ കടത്തുന്നതിനിടെ ഒരാൾ പിടിയിൽ. ഒഡീഷയിലാണ് സംഭവം. സ്പെഷ്യൽ ടാസ്ക് ഫോഴ്സ് നടത്തിയ റെയ്ഡിനിടെയാണ് പ്രതി പിടിയിലായത്. ബൗദ് ജില്ലയിലെ ഒലന്ദ ഗ്രാമവാസിയായ ഹിമാലയ ദാഷിനെയാണ് എസ്.ടി.എഫ് സംഘം അറസ്റ്റ് ചെയ്തത്. പരിശോധനയിൽ ഇയാളുടെ പക്കൽ നിന്നും കടുവ, പുള്ളിപ്പുലി എന്നിവയുടെ തോലുകൾ കണ്ടെത്തി.
രഹസ്യവിവരത്തിന്റെ അടിസ്ഥാനത്തിലാണ് പരിശോധന നടത്തിയത്. വനം വകുപ്പ് ഉദ്യോഗസ്ഥരുടെ സഹായത്തോടെയാണ് എസ്.ടി.എഫ് റെയ്ഡ് സംഘടിപ്പിച്ചത്. അനധികൃതമായാണ് വന്യമൃഗങ്ങളുടെ തോലുകൾ കടത്തിയതെന്ന് ചോദ്യം ചെയ്യലിൽ പ്രതി വെളിപ്പെടുത്തിയിട്ടുണ്ട്.
ദാഷിനെതിരെ 1972-ലെ വന്യജീവി സംരക്ഷണ നിയമ പ്രകാരമാണ് കേസെടുത്തിരിക്കുന്നത്. പിടിച്ചെടുത്ത തോൽ കൂടുതൽ പരിശോധനയ്ക്കായി ഡെറാഡൂണിലെ ലാബിലേക്ക് അയക്കുമെന്ന് അന്വേഷണ സംഘം അറിയിച്ചു. അന്വേഷണം പുരോഗമിക്കുന്നതായും കൂടുതൽ വിവരങ്ങൾ ഉടൻ പുറത്തുവിടുമെന്നും പോലീസ് വ്യക്തമാക്കി.
