ചണ്ഡീഗഢ്: സര്ക്കാര് ഉദ്യോഗസ്ഥരുമായി ചേര്ന്ന് കരാറുകാരില് നിന്നും പണംതട്ടാന് ശ്രമിച്ച സംഭവത്തില് പഞ്ചാബ് ഭക്ഷ്യ സിവില്സപ്ലൈസ് മന്ത്രി ഫൗജ സിങ് സരാരി രാജിവെച്ചു. ഫൗജ സിങ് അഴിമതി നടത്താന് പദ്ധതിയിടുന്നതിന്റെ ഓഡിയോ ക്ലിപ്പ് പുറത്തുവന്നിരുന്നു. ഇതേ തുടര്ന്നാണ് രാജി.
കഴിഞ്ഞ സെപ്തംബറിലാണ് ഫൗജ സിങും അനുയായിയും തമ്മിലുള്ള സംഭാഷണത്തിന്റെ ശബ്ദശകലം പുറത്തുവന്നത്. ഉദ്യോഗസ്ഥരുടെ സഹായത്തോടെ കാരാറുകാരില് നിന്നും പണം കൈക്കലാക്കുന്നതിനെക്കുറിച്ചുള്ള ഇരുവരുടേയും ചര്ച്ചയായിരുന്നു ഓഡിയോ ക്ലിപ്പില്. ആദ്യം ആരോപണങ്ങള് നിഷേധിച്ചുവെങ്കിലും പ്രതിഷേധം ശക്തമായതോടെ ഫൗജ സിങ് മന്ത്രി സ്ഥാനം രാജിവെക്കുകയായിരുന്നു.
മുഖ്യമന്ത്രി ഭഗവന്ത് മന്നിന്റെ വിശ്വസ്തനും പഞ്ചാബ് ആപ്പ് നേതൃത്വത്തിലെ പ്രമുഖനുമായിരുന്നു ഫൗജ സിങ്. അഴിമതി ആരോപണത്തെ തുടര്ന്ന് മന് മന്ത്രിസഭയില് നിന്നും പുറത്തുപോകുന്ന രണ്ടാമത്തെ മന്ത്രിയാണ് ഫൗജ. പഞ്ചാബ് ആരോഗ്യമന്ത്രിയായിരുന്ന ഡോ. വിജയ് സിംഗ്ലയെ മന്ത്രിസഭയില്നിന്ന് പുറത്താക്കിയിരുന്നു. അധികാരത്തിലെത്തി മാസങ്ങള് പിന്നിടുമ്പോള് തന്നെ രണ്ട് മന്ത്രിമാര് രാജിവെക്കേണ്ടി വന്നത് ആംആദ്മി പാര്ട്ടിക്ക് വന് തിരിച്ചടി ആയിരിക്കുകയാണ്.
