ന്യൂഡല്ഹി: ത്രിപുരയില് കോണ്ഗ്രസുമായി സഖ്യമുണ്ടാക്കാന് മുന്കൈ എടുത്ത് സിപിഎം. വരാന് പോകുന്ന നിയമസഭ തിരഞ്ഞെടുപ്പിലേക്കായാണ് നീക്കം. ഇതിന്റെ ഭാഗമായി ത്രിപുരയുടെ ചുമതലയുള്ള കോണ്ഗ്രസ് നേതാവ് അജോയ് കുമാറുമായി സിപിഎം ജനറല് സെക്രട്ടറി സീതാറാം യെച്ചൂരി കൂടിക്കാഴ്ച നടത്തി.
ഡല്ഹിയില് നടന്ന ചര്ച്ചയില് ഇരുപാര്ട്ടികളും തമ്മില് ധാരണയായി എന്നാണ് ലഭിക്കുന്ന വിവരം. സഖ്യത്തില് മറ്റ് ഇടത് പാര്ട്ടികളും ഉണ്ടാകും. സീറ്റുകള് കണ്ടെത്താനും സീറ്റ് വിഭജനം അന്തിമമാക്കാനും പാര്ട്ടി നേതാക്കളുടെ പ്രത്യേക കമ്മിറ്റി ഉടന് തന്നെ രൂപീകരിക്കുമെന്നാണ് ലഭിക്കുന്ന വിവരം.
ബിജെപിക്ക് മറുപക്ഷം നില്ക്കുന്ന പാര്ട്ടികളെ ഒന്നിപ്പിക്കാന് ടിപ്ര മോത പാര്ട്ടിയുടെ ചെയര്പേഴ്സണ് പ്രദ്യോത് മാണിക്യ ദബ്ബര്മന് മുന്നോട്ട് വന്നിരുന്നു. ഇതിന്റെ ഭാഗമായി കോണ്ഗ്രസ് ജനറല് സെക്രട്ടറി പ്രിയങ്ക വദ്രയുമായി ചര്ച്ചയും നടത്തിയിരുന്നു. ഇതിന് പിന്നാലെയാണ് സിപിഎം നീക്കം.
ഈ വര്ഷം മാര്ച്ച് മാസത്തിലാണ് ത്രിപുര നിയമസഭ തിരഞ്ഞെടുപ്പ് നടക്കുന്നത്. പാര്ട്ടിയുടെ ഉറച്ചകോട്ടയായിരുന്ന സംസ്ഥാനത്ത് നേരിട്ട തിരിച്ചടിയില് നിന്ന് കരകയറനാണ് സിപിഎമ്മിന്റെ ശ്രമം. 60 അംഗ സഭയില് എന്ഡിഎയ്ക്ക് 37ഉം സിപിഎമ്മിന് 15 സീറ്റുകളുമാണ് ഉള്ളത്.
