മുൻ ഇന്ത്യൻ ക്യാപ്റ്റൻ മഹേന്ദ്ര സിംഗ് ധോണിയെ കണ്ടു മുട്ടിയതിലുള്ള സന്തോഷം പങ്കുവെച്ച് നടൻ ടൊവിനോ തോമസ്. ക്യാപ്റ്റനൊപ്പം സമയം ചിലവഴിക്കാൻ സാധിച്ചതിൽ സന്തോഷമുണ്ടെന്നും ഓൺസ്ക്രീനിൽ കണ്ടപോലെ തന്നെയാണ് നേരിട്ടെന്നും നടൻ പറഞ്ഞു. ധോണിയ്ക്കൊപ്പമുള്ള ചിത്രവും താരം സമൂഹമാദ്ധ്യമങ്ങളിൽ പങ്കുവെച്ചു.
‘സമയം കൂളായി. ക്യാപ്റ്റൻ കൂളിനൊപ്പം സമയം ചിലവഴിക്കാൻ സാധിച്ചത് മികച്ച ഒരു അനുഭവമാണ്. നമ്മൾ ഓൺസ്ക്രീനിൽ കണ്ട അതേ വ്യക്തി തന്നെ. കൂൾ, ശാന്തം, സ്വതസിദ്ധമായ കഴിവ് എല്ലാം ചേർന്ന വ്യക്തി. ഞങ്ങൾ നല്ല ചർച്ചകൾ നടത്തി. അനായസമായി ഉന്നതമായ ചിന്തകൾ പലപ്പോഴായി അദ്ദേഹം പങ്കുവെച്ചു. ഇങ്ങനെയൊരു അവസരം ലഭിച്ചതിൽ ഞാൻ ഭാഗ്യവാനാണ്. എല്ലാവർക്കും ഒരു നല്ല മാതൃകയാണ് ധോണി. അദ്ദേഹത്തിന്റെ യാത്ര കൂടുതൽ ശോഭിക്കുന്നതാകട്ടെ’ എന്നാണ് ടൊവിനോ കുറിച്ചത്.
വിദ്യാഭ്യാസ വിചക്ഷണനായ ഡോ.കെ.കെ. അബ്ദുൾ ഗഫാറിന്റെ പുസ്തക പ്രകാശ ചടങ്ങിലാണ് ഇരുവരും കണ്ടുമുട്ടിയത്. ബേക്കൽ താജ് ഇന്റർനാഷണലിൽ ഗഫാറിന്റെ ആത്മകഥയായ ‘ഞാൻ സാക്ഷി’യുടെ പ്രകാശന ചടങ്ങിനാണിവർ എത്തിയത്. ധോണിയാണ് ആദ്യമെത്തിയത്. പുസ്തകത്തിന്റെ പ്രകാശനം ധോണി നിർവഹിച്ചു.
