അന്താരാഷ്ട്ര വാണിജ്യ ഉപഗ്രഹ വിക്ഷേപണ രംഗത്ത് ശക്തമായ മുന്നേറ്റത്തിനൊരുങ്ങി ഐഎസ്ആർഒ. ലാറ്റിൻ അമേരിക്ക, ആഫ്രിക്കൻ രാജ്യങ്ങൾക്ക് തങ്ങളുടെ ബഹിരാകാശ സ്വപ്നങ്ങൾ പൂർത്തീകരിക്കാൻ ആവശ്യമായ സൗകര്യങ്ങൾ ഒരുക്കി നൽകാനുള്ള പദ്ധതിയുമാണ് ഇന്ത്യൻ സ്പേസേ് ഏജൻസി മുന്നോട്ട് വന്നിരിക്കുന്നത്.
വിദേശകാര്യ മന്ത്രാലയത്തിന്റെ കൂടി സഹകരണത്തൊടെയായിരിക്കും സ്പേസ് ടെക്നോളജിയുടെ വാണിജ്യ സാധ്യതകൾ ഐഎസ്ആർഒ പ്രയോജനപ്പെടുത്തുക. ആഫ്രിക്ക, ലാറ്റിൻ അമേരിക്ക, മിഡിൽ ഈസ്റ്റ്, സൗത്ത് ഈസ്റ്റ് ഏഷ്യ എന്നിവിടങ്ങളിലെ രാജ്യങ്ങളുമായി ഐഎസ്ആർഒ സഹകരിക്കുമെന്നാണ് ലഭിക്കുന്ന സൂചന. ആഗോള തലത്തിൽ ഐഎസ്ആർഒയുടെ പ്രസക്തിയും ശക്തിയും വർദ്ധിപ്പിക്കാൻ ഇത്തരം ചുവടുവെപ്പുകൾ സഹായിക്കുമെന്ന് ഐഎസ്ആർഒ ചെയർമാൻ ഡോ. സോമനാഥ് പറഞ്ഞു.
മെക്സിക്കൻ സ്പേസ് ഏജൻസിയുമായി ഇതിനുള്ള ചർച്ചകൾ പൂർത്തിയായി. റിമോട്ട് സെൻസറിങ് സാറ്റലേറ്റുകളുടെ നിർമ്മാണവുമായി ബന്ധപ്പെട്ട സഹായമാണ് മെക്സിക്കൻ സ്പേസ് ഏജൻസി ഐഎസ്ആർഒയിൽ നിന്നും തേടുന്നത്. ബഹിരാകാശ ഗവേഷണ രംഗത്ത് വളരെയേറെ പിന്നോക്കം നിൽക്കുന്ന രാജ്യമാണ് മെക്സിക്കോ.
ഭാവിയിൽ ഐഎസ്ആർഒയെ കൂടാതെ മറ്റ് സ്വകാര്യ സ്പേസ് ടെക്നോളജി സ്ഥാപനങ്ങൾക്കും വാണിജ്യ സാധ്യതകൾ പ്രയോജനപ്പെടുത്താൻ സാധിക്കും. 2020- മുതൽ രാജ്യത്ത് സ്വകാര്യ സ്പേസ് ടെക്നോളജി സ്ഥാപനങ്ങൾക്ക് റോക്കറ്റുകൾ നിർമ്മിക്കാനും, വിക്ഷേപിക്കാനും വിക്ഷേപണ കേന്ദ്രങ്ങൾ ഒരുക്കാനും അനുമതിയുണ്ട്.
