റിലീസ് ചെയ്ത് രണ്ടാം വാരം പൂർത്തിയാക്കാൻ ഒരുങ്ങുകയാണ് മാളികപ്പുറം. ഇപ്പോഴും പ്രേക്ഷകരിൽ നിന്ന് വൻ സ്വീകരണമാണ് ചിത്രത്തിന് ലഭിക്കുന്നത്. 2023ലെ ആദ്യ മലയാള ഹിറ്റ് ചിത്രമെന്നും സിനിമാ പ്രേമികൾ പലരും മാളികപ്പുറത്തെ വിശേഷിപ്പിക്കുകയാണ്. അത്രമേൽ കാഴ്ചക്കാരുടെ ഹൃദയത്തിൽ ഇടംപിടിക്കാൻ സിനിമയ്ക്ക് കഴിഞ്ഞുവെന്ന് ചുരുക്കം.
സിനിമ കണ്ടിറങ്ങിയ നിരവധി പേരാണ് തങ്ങൾക്ക് ലഭിച്ച ദൃശ്യാനുഭവം പങ്കുവച്ച് രംഗത്തെത്തുന്നത്. ഇതിൽ മുതിർന്ന സിനിമാതാരങ്ങളും രാഷ്ട്രീയ പ്രമുഖരും സാധാരണക്കാരുമെല്ലാം ഉൾപ്പെടുന്നു. വളരെ സെൻസിറ്റീവായ വിഷയത്തെ അതിമനോഹരമായി കൈകാര്യം ചെയ്യാൻ സാധിച്ചുവെന്നതാണ് മാളികപ്പുറത്തിന്റെ സവിശേഷതയെന്നാണ് പ്രേക്ഷകർ ചൂണ്ടിക്കാട്ടുന്നത്. ഇപ്പോഴിതാ സിനിമ കണ്ട അനുഭവം പങ്കുവച്ചിരിക്കുകയാണ് കെപിസിസി മുൻ പ്രസിഡന്റും കോൺഗ്രസ് നേതാവുമായ വി.എം സുധീരൻ.
“ലതയോടൊപ്പം മാളികപ്പുറം കണ്ടു..
ചിത്രം നന്നായിരിക്കുന്നു.. ഞങ്ങൾക്ക് വളരെ ഇഷ്ടപ്പെട്ടു.. ” ഇതായിരുന്നു വി.എം സുധീരൻ ഫേസ്ബുക്കിൽ കുറിച്ചത്. ഒപ്പം ചിത്രത്തിലെ പ്രധാന കഥാപാത്രത്തെ അവതരിപ്പിച്ച ഉണ്ണി മുകുന്ദനും ബാലതാരങ്ങളായ ദേവനന്ദയും ശ്രീപഥും നിൽക്കുന്ന ചിത്രവും സുധീരൻ പോസ്റ്റ് ചെയ്തിരുന്നു. സുധീരന്റെ ഫേസ്ബുക്ക് പോസ്റ്റിനെ നടൻ ഉണ്ണിയും തന്റെ പേജിൽ ഷെയർ ചെയ്തിട്ടുണ്ട്.
